電影《La La Land 》男女主角喺山頂跳踢躂舞談情一幕真係超浪漫，而最新一集的《愛·回家之開心速遞》就向咗呢個經典致敬，唔少觀眾睇完都大讚《愛‧回家》劇組製作認真，覺得呢幕可以令大家留下深刻印象咁話。
從片段可見，熊心如（蘇韻姿飾演）同池子孝（阮政峰飾演）跟足電影造型穿上黃色連身裙、白恤衫黑西褲皮鞋，仲帶埋街燈、石椅等道具上到香港飛鵝山拍攝，單睇硬件配置已經誠意十足，再睇埋兩位演員舞姿嘅表現， 真係唔俾讚都唔得。根據媒體報道，蘇韻姿同池子孝已經花咗半個月時間排舞，而呢段舞更係由蘇韻姿一手一腳排出嚟。
為咗追求更完美效果，蘇韻姿為呢段舞排咗好幾個版本，「唔知大家有冇睇琴晚嗰集開心速遞呢？呢part舞係排嘅第一個版本，雖然拍攝嘅時候選擇左另外一個版本黎用，但係我好鍾意呢一段舞所以都想分享俾大家！呢一幕戲我哋真係俾咗好多心機去做-多謝監製，導演俾機會我編舞，同埋要多謝我好拍檔嘅配合同努力！」
為咗呢幕唔夠兩分鐘嘅戲落咁多心機，呢兩位演員真係非常認真，甚至認真到連觀眾都感受到，難怪《愛‧回家》近期收視可以同黃金時段劇集睇齊。
圖片來源：互聯網
影片來源：my TV SUPER(www.mytvsuper.com)，Summit Entertainment，蘇韻姿@Instargram