由楊千嬅、余文樂主演的都市愛情片系列電影《春嬌救志明》將會推出電影原聲大碟，今次收錄了多首歌曲，其中一首是由楊千嬅翻唱陳百強的《當我想起你》，今次千嬅誠意打動樂仔開金口唱了四句歌詞，自言有錄音室恐懼症的樂仔更做順水人情幫手拍埋MV，不過樂仔要求千嬅回報條件，是在紅館舉行演唱會時安排他一嚐升上台的滋味！
早前楊千嬅、余文樂為《春嬌救志明》到北京舉行發佈會，二人難得抽出空檔拍《當我想起你》MV今次樂仔拍膊頭獻唱兼拍MV，樂仔笑說：「其實我係聽聞你（千嬅）想搵個model代替我，我諗下應該冇model可以代替到我，咁我唯有自己做返，咁你又慳錢。」在旁的千嬅聞言哈哈大笑！樂仔又扮千嬅游說他說：「我首歌本來係搵其他人唱，但係我覺得把聲好似你唱會好點，於是我話：『好啦！好啦！我唱啦！』跟住千嬅又話：『咁MV個樣如果唔你又好似唔係咁好？』佢（千嬅）係咁一步一步咁，我估佢第時唱現場又叫我去唱！」千嬅在旁笑到標眼淚說：「唔會喎！現場唱我播你條聲算！」
千嬅其實早已為《當我想起你》錄音，但她總覺得好似欠了些甚，而且她回想起劇情有些感動位，千嬅對樂仔表示，要信相她的音樂直覺。樂仔笑說：「我梗係唔敢懷疑你，你睇下我的音樂成就係零就知！」千嬅指樂仔太謙說：「我同你唱過K，真心係唱得好！如果你唱得難聽我會講，你走音我真係咩你！」千嬅表示曾想過找一個男人背影來拍，樂仔即說：「飛圖年代！」千嬅笑：「我知你忙嘛！咁搏好過唔搏！」樂仔抵死說：「在公在私比你搏到啦！」千嬅即攬住樂仔大讚他有義氣！不過樂仔大嘆自己被千嬅抽水！
樂仔已很久沒有唱歌，他自言因為有錄音室恐懼症，然雖他以前曾出過唱片，會有時難免會有驚恐，千嬅亦表示十分明白這心理，因為她自己也試過。樂仔又對千嬅表示，自己有一個願望及要求，他說：「他朝一日你在紅館有演唱會，可唔可搵我做嘉賓，由台底升上台面，我咁大個仔都未試過咁，我有幻想升上台面，不過我升完就走,唔好叫我表演純粹過癮！」千嬅吃驚笑說：「咁幾尷尬喎！咁升完上去又落返去，咁好型，都好犀利！開埠以來冇人做過呢件事！」千嬅笑言這個要求要重新考慮！
影片提供︰寰亞電影
