Advertisement

13歲做童工養妹妹 菊梓喬解都市傳聞│菊梓喬專訪

本地
2024.03.22
撰文:劉家倫攝影:洪志富

說菊梓喬Hana是樂壇奇葩不為過,入行8年,三度蟬聯無綫「最受歡迎女歌星」,平了鄭秀文和楊千嬅的紀錄;Hana亦有豐富娛樂性,得獎時在旁的吳若希瘋狂大笑,一度成為網民的me me梗圖,觀眾喜歡看她們爭一姐的新聞。

關於Hana的傳聞,有孤兒、有吳卓羲,還有指她患有多齒症,聽落奇怪,但原來最後這個才是真;這位前「星夢一姐」,今年三月正式宣布加盟星演國際與伯樂何哲圖再續前緣,這對幕前孖公仔又是網民的「我最喜愛組合」。

whatsapp-image-2024-03-14-at-14-33-58-3

轉會即時生效,但Hana身邊都是她入行至今的幫手,可見Herman希望以原班人馬再幫Hana打江山,已有一段時候沒有安排訪問,Hana坐下來深呼吸一下:「嘩,有點緊張。」

Hana入行至今,與四個名字經常掛在一起,何哲圖、余詠珊、吳若希和吳卓羲,不如讓Hana先解說一下與他們的關係,Hana說:「Herman就是一位好重要的人,是我的伯樂,給了我第一首劇集歌曲,我一直都好感激他,其實他都有唔好,佢對我真係好惡㗎,不過大家睇唔到呢一面!」

Hana正式宣布加盟星演國際,與伯樂何哲圖再續前緣,余詠珊也上台祝賀。
Hana正式宣布加盟星演國際,與伯樂何哲圖再續前緣,余詠珊也上台祝賀。

至於余詠珊,與老公Herman離巢無綫後,齊齊過檔HOY TV,製作出不少新節目,Hana說:「相反Sandy姐是超級nice,她每次見我都會讚我,可能她對個個artist都係咁,但會讚到我好開心。」

Hana連奪三屆「最受歡迎女歌星」,不但打破天后王菲和陳慧琳兩奪的紀錄,更平了鄭秀文和楊千嬅的紀錄,風頭一時無倆。
Hana連奪三屆「最受歡迎女歌星」,不但打破天后王菲和陳慧琳兩奪的紀錄,更平了鄭秀文和楊千嬅的紀錄,風頭一時無倆。

而曾經爭做一姐的吳若希,Hana離巢時,Jinny亦隔空送祝福表示:「以佢嘅能力,去到邊度都可以繼續做一姐。」對此,Hana說:「我都希望有一日係囉,但我唔覺得自己可以做到一個大家姐嘅角色,我都只係一個員工,(點睇頒獎禮上Jinny大笑?)我覺得佢係覺得開心,唔知呀,開心都好多種呀。」

Hana得獎時,在旁的吳若希大笑,一度成為網民熱論。
Hana得獎時,在旁的吳若希大笑,一度成為網民熱論。

而Hana入行至今,唯一傳過的緋聞是吳卓羲,事緣今次吳卓羲在微博tag了Hana,究竟兩人如何認識?「第一次見面是工作上,之後,原來大家有共同朋友,朋友都會食吓飯啦,都好正常,(咁有冇追過你?)唔知喎,哈哈!」問Hana兩人有沒有單獨食過飯?Hana靜了片刻,「我成日都同好多朋友食飯,不過你冇影到或者大家唔認得我啫。」

whatsapp-image-2024-03-14-at-14-33-51-2

Hana直言Herman離開無綫後,她開始感到迷失,「好迷失,因為公司人士調動好大,例如身邊一班一直合作的同事一個一個離職,之後Herman知道我都就嚟完約,老實講,開頭唔係話要簽佢嘅,真係傾計,大家出嚟傾吓傾吓,好似返咗以前咁樣喎,成件事好順利。」

外界指無綫力谷一班《聲夢》學員、《中年好聲音》的歌手及《亞洲超星團》,以致Hana被冷待;提到炎明熹,Hana說:「她參加比賽時我們有見過,我覺得每個時代都有紅嘅artist呀,正常我係公司都會捧一個澎澎聲上緊嘅人啦,冇問題呀,唔會死捧爛捧一個人嘛。」

問Hana決定不續約的原因,她解釋︰「因為我一入行已經有兩間公司co-management,好多時合約上或者工作上嘅嘢,都唔輪到我話事。」簽約無綫之前,Hana於2016年簽約「創富文化集團」,經介紹曾到環球音樂、華納唱片及英皇娛樂等各大唱片公司試音,最終簽約無綫「星夢娛樂」,憑歌曲《今天的我》正式出道;她最初只用「HANA」作藝名,後來Herman替她改了「菊梓喬」為藝名,當時旗下歌星包括胡鴻鈞、譚嘉儀、鄭俊弘、何雁詩、許廷鏗和吳若希等,但Hana明顯受力捧, 2018年首奪「最受歡迎女歌星」,更三度蟬聯。

離開無綫時,Hana在社交平台以黑屏白字連發兩條限時動態:「感謝這2555天終於來到這一天,這段時間一直回憶着過去,很不捨,有喜有悲,百感交集。」問到Hana怎樣形容這七年?Hana說:「好似發咗一場夢咁,由我開始追夢,當初亦冇諗過會追到夢,這一刻的感覺就係夢醒,講返『最受歡迎女歌星』,呢個獎項唔係屬於我自己,係屬於成隊team,一齊去努力去跑呀、去做音樂呀,我只係幫大家去拎呢個獎,我自己係冇能力攞到。」對於當時外界的聲音,Hana說:「我會選擇唔聽唔睇,我最初入行的時候,睇過幾個新聞,我係有好嚴重嘅抑鬱,好恐怖,我知道自己係承受唔到,而我又係一個好直嘅人,我知道做呢個行業,係唔方便同大家理論,我最記得有一個傳聞話我係孤兒,我之後就block晒所有social media嘅嘢,唔睇!」

whatsapp-image-2024-03-14-at-14-33-57-2

Hana被傳是孤兒,是因為父母在她小時候相繼離開屋企,「我點解要講呢件事呢,我係想話俾大家聽,追夢係冇藉口,係呀,我唔係有錢人,直頭冇屋企人添,但我都可以做到,當中有好多堅持、好多執着、好多過程,所以我先想將我長大經歷會同大家分享。」

Hana記得父親在她十歲時離家,母親大約兩年後便相繼離開她與妹妹,「媽咪大約在我十二、三歲左右離開屋企,得返我同妹妹,十三歲便開始做童工,係經社工介紹,當時賣書執頭執尾,唔可以超過八個鐘,有個時間限制,之後你講得出嘅工作我都做過,都係用勞力,我做過美容院、做過髮型屋、做過餐廳、做過文員。」

這次Hana亦逐一澄清幾個都市傳聞,「我記得有人話我報細年紀,冇!有人話我患有多齒症,這個我想澄清,我的確係有一粒好細粒嘅牙會不停生長,但呢個問題,牙醫已經幫我解決好,到現在仍有人會話要數下我有幾多隻牙,哈哈!我冇事喇。」

whatsapp-image-2024-03-14-at-14-33-53

加盟新公司之後,Hana仍等緊派新歌,但她希望嘗試拍劇、拍節目,至於可否亮相其他電視台?她說:「暫時都未清楚,如果可以我覺得好好呀,好多電視台我都未上過,Viu都未上過,其實呢,我以前曾經去過Viu casting一個節目,嗰陣未入TVB嘅。」與無綫的關係,Hana說仍保持友好,「呢間公司幫我好多,幫我成功追夢,好多謝TVB。」

 

髮型:wilfred_hui

場地:Tapa Room

MIRROR 姜濤 陳卓賢
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹