黃宗澤（Bosco）接受雷霆881商業一台《星光背後》專訪，透露2008年踩過界做歌手非自己意願，他說：「係唔知點解做咗歌手，年輕時唔輪到我話事，樂小姐話幫我出歌，個個小生花旦都出，你叫我乜就做。」他更指當年兼顧拍劇，根本無暇兼顧唱歌，「拍劇根本沒時間，得三日時間要學識又跳又唱，試過中環拍一首MV，排舞師即場教即學即拍。」
Bosco於2009年的勁歌頒獎禮，因為被抽中與陳奕迅合唱《K歌之王》，被網友嘲諷至今，他說：「無端端live對住Eason唱喎，壓力大到黐線頂硬上，又未練過首歌，嗰次離台mon又好遠，根本靠估聽唔到自己唱乜，我仲同Eason講：『幫幫忙帶下，真係唔熟。』Eason仲話：『得！放心啦！』你哋睇唔到我手心濕晒、壓力大到出晒汗！」遭網絡欺凌多年，但Bosco並沒有介懷，「我唔係靠唱歌搵食，又無學過，有瑕疵正常。從來唔覺得被bully，至今仍然記得，幾開心吖！之後仲有人搵我二次創作錄多一首《發夢之王》拍廣告，佢哋事前仲問我介唔介意？點會介意！好玩添！真係唔需要唔開心，至今有件事令人記得你。」
成長於單親家庭的Bosco，出名孝順人緣好，投資有道開食肆又被喻為絕世好老闆，看到同輩的林峯早已成家立室，吳卓羲亦傳聞有另一半，他不會羨慕：「又冇咩，我有好多朋友，又咁忙，過時過節都唔寂寞，會有好多人喺屋企開派對。」他更坦言由細到大都沒有憧憬成家，「或者因為我受單親家庭成長影響，完全冇呢個畫面或概念，從小到大也沒諗過幾多歲結婚或者要生幾多個小朋友，完全沒有！」至於媽媽有沒有催他早些成家立室，Bosco說：「都冇！從來冇催促我呢件事。」他更突然自爆：「要做我女朋友？過咗我阿媽嗰關先講啦！哈！佢不知趕走咗幾多個啦……哎呀！我講咗啲乜！哎呀！哈哈！」
Bosco談到擇偶條件，即回復正經，「首先佢唔可以介意我做呢一行，因為必定會成為焦點俾人影；其次，我唔鍾意太嗲或小鳥依人，我鍾意識得照顧自己嘅女仔；仲有，我愛整齊，譬如我屋企洗手間嘅護膚品，我會擺放到一絲不苟，好似display一樣，好介意人哋整亂我啲嘢，一被人整亂，我就發忟；其實我返到屋企，係鍾意靜好少講嘢，睇吓邊個咁唔好彩識到我。」
Bosco予人感覺已很久沒有拍拖，原來他只是將感情低調處理，他說：「其實中間我都有識女朋友，只不過大家冇發現。但依家我唔敢主動啦，好怕識新朋友，因為出過事。之前有朋友帶新朋友嚟食飯，我只係同枱食飯禮貌上同對方講咗啲嘢，點知佢將我嘅說話分享上網，咁就變咗誤會同花邊新聞，之後就怕啦，識新朋友會好小心。但我識女仔仍然好open，但要認識吓先！」