馮允謙（Jay Fung）近日為樂壇新人MC張天賦新歌《反對無效》作曲，獲外界一致好評，二人日前更一起走進錄音室，合唱《反對無效》英文版《How Many Times》，以及Jay的新歌《因愛之罪名》英文版《Can’t Stop Myself Tonight》，齊齊鬥飆高音。
當日錄音，兩人雖然是第一次見面，但Jay對後輩非常照顧，由於兩首歌的高音部分相當多，Jay於是細心地指導心情緊張的MC一些飆高音小技巧，未幾，兩人已在鏡頭後又唱又跳，很快打成一片。「今日可以邀請到阿Jay上嚟同我合唱兩首歌，我好開心，又好緊張，之前聽人講阿Jay份人好nice，而家見埋真人，真人原來更加nice。」MC難掩興奮地說。
Jay見狀，發揮了他的搞笑本色說：「我想講，你首歌真係好好聽，哈哈！唔係因為首歌係我作，而係你真係唱得好好，你唱得咁好聽，我冇可能唔nice啦！」
MC回想當日收到《反對無效》的demo時，聽到前奏，便愛上了這首歌，他說：「Jay喺個demo一開頭有段ad-lib，我一聽到就同同事講『得嘞！我要呢首歌！』我好想學到你嗰段ad-lib，但我到而家都精通唔到。」
之後Jay順應MC的要求，現場演繹該段ad-lib，還鼓勵MC：「其實辛苦晒MC，因為《反對無效》呢首歌好高音，好難唱，但MC唱得好正，啲高音好正，我之前有睇你《全民造星2》，知道你唱歌好好聽，下次不如我再寫隻飆高音嘅歌俾你。」