新城DJ鄭啟泰近日宣布成功向女友王雁芝求婚及回歸新城電台，可是鄭啟泰卻在前日（2月3日）突然逝世，終年56歲。今日（5日）新城電台首席營運總監馬浚偉接受傳媒訪問，對不幸事件作出回應。馬浚偉指邀鄭啟泰回巢，原定在新城知訊台開咪，與T-Max、麥皓兒齊主持直播節目，他說：「由於鄭啟泰本來是與2位年青新人合作，2位主持人會繼續做下去。」同時強調如鄭啟泰家人有需要，他自己個人或新城電台都會全力協助。
馬浚偉又回憶當年與鄭啟泰在TVB，因為同是演員而相熟，他說：「我哋熟係因為喺TVB，以前我哋係演員嘅時候好熟，但無論如何我覺得佢同呢度（新城）嘅感情太深，同埋佢同成個演藝界都好深，所以我有好多朋友都WhatsApp我，大家都覺得好難過，得知死訊時亦都好震驚、突然。」馬浚偉指鄭啟泰生前兩星期，二人傾合作時都相當開心、不帶遺憾，他說：「我叫佢返嚟，係呢度相見嘅時候都傾得好開心，佢真係笑得好開心，既然佢係咁嘅性格，咁我哋就繼續將佢呢一份力量發揚光大。當時佢返嚟新城，面色幾好，開咗一次會，第二次返嚟送玫瑰花，其實係好近嘅事，所以其實都唔明，但係我哋唔係醫療嘅專家，當然唔可以亂咁下判斷，呢個交返佢家人去了解。」
由於二人都有共同信仰，馬浚偉相信將來會在天家再見，他說︰「我感恩嘅一樣嘢係我哋有共同信仰，起碼佢返天家之前兩個禮拜，我令佢笑得好開心，又捉到佢返嚟呢一個佢自己咁鍾意嘅大家庭，我起碼無遺憾！當然佢嘅離開好不捨，但我哋遲早都會見返。」最後馬浚偉更指獲鄭啟泰家人的同意下，在周三（2月7日）下午4時播出鄭啟泰紀念特輯，他說：「希望表達心意也秉承鄭啟泰帶給觀眾開心歡樂的精神。」