雲浩影（Cloud）日前拍攝新歌《無以名狀的痛》MV，無論歌詞和MV故事都是她的自身經歷。她說：「年初攞完新人獎，過咗新人年，自己唔係好知點樣應對未知嘅將來，所以有呢首歌。好想藉住呢首歌話俾大家知，如果你有呢啲狀態，唔使怪責自己，因為好正常嘅，我都同你一齊去面對。」
Cloud表示MV最難忘是刮痧的場景，她說：「因為請咗一位真正刮痧師傅，導演唔想佢真係刮到我背脊紅晒，因為之後仲有鏡頭，要求佢『扮』，唔好刮出痧。咁樣對於專業師傅嚟講係好大挑戰，一開始師傅話無油刮唔郁，反而會弄傷皮膚，於是加咗少少BB油。一有油佢就控制唔到，起勢刮，結果出咗少少痧。」不過Cloud有得着，師傅教咗她一啲刮痧知識，例如咩顏色代表身體咩體質，獲益良多。
至於浸浴和嚎哭戲，Cloud花最多時間拍攝。她說：「浸水戲有熱水，衣服透視程度亦剛剛好，效果好唯美。事前我低估咗浴缸戲嘅難度，平時鏡頭前見人哋上水戲好靚。當日一落水個鼻就入晒水，好似游水濁襯咁，來回拍咗幾次之後，我個頭暈暈地。」Cloud之前演過喊戲，但今次的拍攝是不一樣的哭，而且亦較多層次，她說：「對演喊戲無乜心得，拍之前無幻想要喊咁多次，最初以為只有一場喊戲，喊完嗰take 過咗就過咗，點知今次每個場口都喊，唔係喊得好勁嗰種，但keep住抑鬱狀態，默默落淚，有難度。」