陳豪及朱凱婷今日獲TVB頒發2023 年上半年度傑出員工獎，陳豪笑言應該係靠咖啡令佢有機會被提名再獲獎，「服務咗廿年，比金牌仲勁，大家都知我喺拍嘢嘅廠都會有coffee corner，可能因為呢個原因，有少少見效，令大家可以放低工作嘅煩惱，放鬆下，重新投入工作，最大得着係多咗好多朋友外，亦開始令大家懂得品嘗咖啡，我最開心。我覺得好嘅員工係要做好自己工作，先可以將正能量散發俾身邊人，其實我唔知藝人可以攞呢個獎，但既然我都可以攞，我相信大家都可以攞，至於問我憑咩攞？我相信做人及心態，因為我性格冇情緒，冇咩所謂，好隨和，唔好嘢亦唔會投放身邊人，總之做好本份為重要，唔好去計較，盡量去幫人，將成件事合力做到最好。」今年跟太太結婚十周年，「每年都一定會慶祝，原本想十周年都搞大型慶祝一下，但時間上不大太理想，太太同小朋友又準備去加拿大，所以我們打算明年先好好慶祝。」
同樣獲獎的朱凱婷則說：「我做傑出員工頒獎主持都好多年，無諗過我可以攞獎，其實我每次做一個show，都係幾個部門通力合作，所以我一向好重視大家感受，相信同我共事嘅人都知我好少講no字，做任何事只會比滿意更滿意，令大家可以更放心。」
