陳奕迅（Eason）紅館跨年演唱會昨晚（11日）來到第三場，由第二晚開始，歌迷看過報道，都已經知道Eason這次演唱會是有主題，會一口氣連唱29首歌，才稍作停頓跟大家打招呼說話，所以入場的觀眾都屏息靜聽每首歌，期間只以拍掌歡呼揼地支持，並以手勢跟Eason打招呼。
當Eason唱到《幸福摩天輪》時，有接近舞台邊觀眾把握機會一博，拿出CD希望他可以簽名，意想不到Eason竟然答應，接過CD後，他笑言：「我好似未試過做做下演唱會簽CD……」，他更細心問那位觀眾名字，觀眾報上名後，他又問：「睿智，係咪智慧個智？」對方大叫：「士心志呀…」Eason笑道，「咁你今晚改名啦！」然後把簽名CD送回給對方，並且伸手跟對方互擊拳頭。演唱會後，Eason表示：「我最後係簽咗睿智（志）。因為我已經寫咗啦，冇計啦！」
唱畢四部曲後，Eason返回樂手位置，先是拿消毒藥水噴手，然後作勢問拿了CD的觀眾，「75%酒精，你要唔要都噴下？下次我應該袋定支嘢先，係咁㗎啦依家，冇辦法啦。」然後他除下耳機，享受觀眾呼歡及叫聲，「邊一個發明咗耳機？係有啲掃興㗎。八十年代喺紅館睇騷，雖無耳機但即時反應係好正。今晚你哋都好正，冇理由我唱緊歌你哋都仲狂叫啦，我雖然聽唔到你哋啲聲，都見到大家眼神，仲有個啲燈牌，你睇…成晚睇住『肥陳』兩個字，其實好掃興…」歌迷即換上「歌聖」燈牌，Eason笑道，「歌聖？歌手算啦。佢哋好特別，成日整燈牌都好特別，幾十歲人仲咁有興緻，我都就嚟50啦，仲有燈牌，I’m Still Hot！woo……」
觀眾即報以熱烈掌聲及歡呼，Eason繼續搞笑，「我不嬲都唔係走偶像啦，竟然仲有呢啲，唔係我俾，佢哋自己俾錢整㗎，我唔會俾呢啲錢啦，留返嚟做好唱片好過，依家做CD係做紀念品咁做，有邊個屋企仲有CD機？其實唔多。依家係電話世界嘛，我已接受咗喇，你影我啦，你唔影我，我覺得自己冇存在價值，哈哈……你影我……哈哈。」
Eason又反問觀眾：「你哋係咪從來未試過喺紅館睇一個演唱會，有歌手由頭到尾冇斷過咁唱歌？冇乜講嘢？我成功咗喇！其實真係好正，係咪覺得聽得『入』好多？音響又好好！」觀眾大叫回應：「超正呀！正到癲！正到黐線！」Eason此刻一度感動得想咽哽，不停回贈掌聲給觀眾，畫面見他咬唇死忍勁想喊：「我都講唔到我準備要講嘅嘢㗎喇……最想講係多謝你哋等咗咁耐，都等！好開心呢件事實現咗！完成咗三場！」繼而見他低頭用手做了一個抹臉的手勢，忍回想喊的情緒，再說：「我唔會去嗰度㗎（唔會喊）……冇你哋係做唔成，好簡單！不如我哋郁吓啦！準備好未？我希望大家跳到甩骹，跳到斷氣為止，Let’s郁！」繼而party mode開始，全場跟着他起身勁跳。
來到Encore環節，Eason昨晚選唱了《黃金時代》，一開聲已經震烈紅館，觀眾之後瘋狂在Eason youtube channel洗版留言，更形容他是阿根廷足球代表隊隊長美斯！