今年中大功告成，在紅館開完26場廿周年演唱會嘅張敬軒，年尾輪到在會展開騷。今次軒仔話準備為20周年再做一個大總結，將於12月20至1月2日在灣仔會展開足十場！ 繼上年聖誕同歌迷一齊過之後，今次連聖誕同跨年都有軒公陪！演唱會門票下星期三（16日）優先訂購喇！
演唱會名為《Revisit張敬軒演唱會 》，所以今次連海報都係在飛機上面影！3年冇上過機，無論軒仔同工作人員上到機都非常開心，軒仔仲笑言話直頭有「陌生感覺」！由紅館飛到過灣仔會展，軒仔笑道，「係呀，我今次飛灣仔，交通好方便，因為有東鐵線，哈哈。我哋之前做完26場二十周年演唱會，歌迷話我仲有好多歌未唱、仲想聽，所以見時間又ok ，好多方面都配合到，所以就決定不如一齊為呢個20周年寫上一個完美句號啦。 演唱會用《Revisit》，這個字中文解作舊地重遊。所以這個演唱會，我將帶領大家，用我的歌同大家一起重遊20年的回憶。對人對事對青春一齊來遊歷一次，我相信歌迷同我一樣，會有好多回憶。」
今次將會開三面台，軒仔話已經好幾年冇做過三面台，所以覺得好有新鮮感。「今次我哋都好大製作，好重本。首先音響方面，保證每一個觀眾會有聽覺上最高享受；另外視覺上都會好靚，聖誕新年是開心日子，所以成個騷不會似上一次咁heavy，會歡樂好多。另外都一定唔會剩係唱side track，雖然好多歌迷話好多side track想聽，但係今次係重遊20周年的歌，所以經典的好聽的都會唱。」
為了影演唱會海報，今次包了一個大形機艙拍攝場景。3年未上過飛機，軒仔話上機有點陌生感覺，不過他亦非常期待可以飛，所以一做完這個騷，他就會馬上飛去旅行。但這3年不能飛，他認為也不是很可惜，因為大家花多好多時間遊歷香港這個地方，「呢3年大家睇多咗香港本身好多靚風景，而且疫情都教咗我哋好多嘢，人同人之間相處，回憶變得好珍貴。」有軒公陪過聖誕同跨年，更加有回憶啦！
