由郭偉亮(Eric)、 方力申、胡美貽（Nicole）、黃紫恩（Jojo）同譚焯升（Clevis）主持的《鋪鋪 Poker》，今晚一集嘉賓是單立文 （豹哥）。
豹哥在電影《賭俠》中演大奸角「侯賽因」，賭術精湛鋪鋪幾百萬上落。戲中有句經典對白，是侯賽因奸笑對住劉德華講「開嚟見我『吐啤』，想偷我雞？」這幕今晚將會重現。豹哥亮相節目時亦交足戲，一來就同 Poker 教父 Ricky 講笑話「幫我換廿萬美金先」。 節目一開始豹哥就澄清戲中同劉德華、周星馳鋪鋪幾百萬上落，他說︰「其實真實生活冇賭運，啲人以為我賭術好叻，其實我好渣同個心好怯，唔夠膽贏錢㗎。」
Eric 透露因自從節目開始，就已經想請豹哥做嘉賓，因為豹哥對音樂的熱誠， 好值得尊重︰「唔止對佢音樂造詣崇拜，通常做音樂嘅人都好 serious，豹哥好有幽默感。 佢拍劇《愛·回家之開心速遞》同拍《賭俠》侯賽因嘅角色好經典，想睇佢同賭枱嘅啤牌再發生關係。」
幾位 J2ers 都對候賽因的角色印象深刻，Clevis 表示已不止一次重溫《賭俠》這套戲。估不到第一鋪牌，豹哥就重現同劉德華對決的場面。當時牌局只剩下豹哥跟 Nicole，豹哥手上的牌，正好同枱上的啤牌組成「吐啤」。
豹哥自言向來沒有賭運，最多都是打麻雀，又笑言敢輸不敢贏，因為贏了的錢不懂處理。 他還自爆有過瘋狂歲月，試過有年多兩年的時間，每日都是 6 點半新聞時段才起床，他笑說︰「嗰時興 Rave Party，日頭瞓，夜晚就去玩。啲腳有 LMF、謝霆鋒、何超儀，玩完一個場仲唔夠，玩到最後一個場，磨爛蓆仲周圍問人有冇第二個場。」差不多每日都是「見光死」，玩到朝早才返屋企。而老婆胡蓓蔚則以「煩音」勸豹哥「唔好咁夜瞓啦」，豹哥最後都聽老婆話，改掉壞習慣，「同以前啲腳傾起，都好有回憶」。
