Yellow（野佬）對上一次開 show 已經係 2018 年，闊別舞台三年，Yellow 野佬將在十月頭與樂迷重聚！由於成員何兆基已離港移民到加拿大，今次開 Show 將會係野佬首次以四子形式演出。
野佬是次音樂會會以散聚為主題，帶出今日即使各自散到不同的地方，他日定會再次聚在一起，希望可以和樂迷笑住面對目前的種種。阿銘說：「今次音樂會會以散聚嘅嘢 作為主題，相比我哋一貫嘅輕鬆歡笑作風較為正經，甚至帶點沉重,奈何呢一個移民潮正正發生緊喺香港人身上，而我哋亦正在切身面對緊呢個議題，感受好深，影響亦比預期中大。」
小胡說：「相信好多人都同我哋經歷緊同一樣嘢，身邊好多朋友屋企人都選擇移民，所以今次呢個音樂會亦都係講緊大家近期所經歷嘅事。」Wilson 說：「變幻原是永恆，彷彿是已故黃沾先生對香港人宿命最貼地的描寫，幾十年走來，每一代的我們都學會在變幻尋找一絲安穩，時而嬉笑，偶然怒罵；命運教我們學會隨機而變，離合散聚早早深深注入我們的基因內。 大家心中的那一片天地才是我們真正的家鄉。」
對於隊友何兆基已移民到加拿大，今次音樂會五缺一，剩下的野佬們又會怎樣面對？有什麼想對大家講？阿銘說：「確實有點不習慣。同自己講句盡力做。今日走咗一個。將來唔知會唔會到下一個走，趁仲有得做就盡力做，要把握同珍惜，好好 Enjoy！」阿康說：「對於我嚟講，每一次嘅野佬音樂會都與快樂畫上等號。2018 年之後，世界發生巨變，阿叔回流加國，各隊員適應需時，亦是一個重新思索樂隊方向嘅機會。經過一段時間調整終於再有野佬嘅 concert，而家嘅野佬幽默依然，更加添了幾分感性。」
Wilson 說：「就如每一個香港人一樣，野佬切切實實的在經歷分離的命運，可是我們不敢放棄，不停思考怎樣用新的形式走下去，靜待，我們相信，終有一天會再重聚。」小胡說：「 希望藉住呢個音樂會，鼓勵返大家之如又鼓勵返自己！剩低的，鍛鍊好自己！離開的，好好繼續生活！我們約定一天再見！」
而身處於遠方嘅隊友何兆基亦有些說話想跟野佬說，「以前大家乜都係睇我頭，但今次演唱會，好高興見到我唔喺度嘅時候你哋4個更加團結，無咗我呢個大叔喺度阿吱阿咗，反而見到大家成⻑咗、處事成熟咗。」
《 Yellow!野佬散聚嘅野音樂會 2021》
日期:2021 年 10 月 8 日（星期五）
時間:晚上 8 時 15 分
地點:麥花臣場館