鄭欣宜（Joyce）昨晚（17日）於紅館舉行第二場「Believe Us 鄭欣宜演唱會 2023」，座無虛席。
前晚頭場特別嘉賓是鄭裕玲，昨晚則邀請了同樣是「鄭氏宗親」的鄭中基（Ronald）擔任表演嘉賓。Joyce介紹Ronald出場時，坦言對他的單眼皮情有獨鍾，小時候在加拿大生活時狂煲其電影VCD，長大後欣賞他敢言和做自己很喜歡的事情。當Ronald升上舞台，觀眾驚喜歡呼，並齊聲叫他的招牌口號「Wee」，非常熱情！ Joyce之後對Ronald說：「多謝你嚟做我嘉賓，我好鍾意你㗎，我真係由細到大都對你心心眼！」她透露早前執屋，無意間發現初戀男友舊照，原來他與Ronald都是單眼皮，但Ronald說：「我覺得好對你唔住，依家我老咗變咗雙眼皮，因為啲皮鬆咗。所以你要諗清楚，如果鍾意單眼皮男仔，可能佢老咗變雙眼皮。」
Joyce中文用詞有限，誤會Ronald的新計劃「機動兵工廠」是「機動兵工『床』」，結果要用英語解說。她又表示好想參與其中：「我都好想你同我『培訓』，一起『培訓』‥‥‥」即引來全場大笑，Ronald也聽到皺眉，笑說：「你知唔知『培訓』點解？（知，Training）係啦，不如講『Training』啦，因為你講嗰個詞比較尷尬。」Joyce繼續自薦：「我知道呢個Training有acting同埋singing，呢兩樣嘢我都有做㗎！」Ronald則支吾以對：「但我哋有年齡限制，由21歲到 35歲‥‥‥」Joyce立即興奮地說：「咁就掂啦，我5月30日之前都仲係 35歲。」Ronald說：「但我唔掂喎，訓練咗你兩個月之後就 36歲。」Joyce續說：「中女都有中女特別味道，你改咗個年齡框。（即係改為21到36歲）嗱，大家聽住架，改咗啦！」Ronald搖頭笑說：「我真係估唔到我第一次搞真人騷就要造馬，即係要我選你‥‥‥喂，講完『培訓』然後『我選你』‥‥‥我『挑』選你‥‥‥哎呀，我哋都係返入後台再講。」兩人語帶雙關，令全場爆笑，Joyce也捧腹大笑。她之後點唱Ronald的《我代你哭》，「呢首歌係許廷鏗介紹我聽，但佢就唱得‥‥‥我想聽原唱！」許廷鏗即在觀眾席扮嬲，深深不忿指住台上的Joyce，場面搞笑。
Ronald獨唱後，Joyce穿着閃亮運動裝再度登場，她與二十位舞蹈員一口氣表演《罰你》、《你瘦夠了嗎？》和《豐乳肥臀》，連續近十分鐘勁歌熱舞，愈跳愈起勁，全場觀眾熱情跳舞拍掌。在Encore環節，Joyce穿上金色長裙，演繹《先哭為敬》、《配角》、《無表面傷痕》和《女神》等金曲，配合來自英國的Ground Support 打造的燈光效果，非常震撼。完場後，觀眾仍不肯離開，要求再度encore，Joyce加碼唱《無權愛我》和《渺小》後，演唱會才圓滿結束。
