鄭伊健去年在紅館舉行一連9場《HERE AND NOW 鄭伊健演唱會2022》叫好叫座，今年他積極籌備巡迴演出，早前更帶同小師妹黃淑蔓（Feanna）一起飛到美國三藩市以及洛杉磯演出，可惜他完成三藩市巡唱後，開始有感冒病徵，最後要帶病上台，靠意志力完成整場演唱會。 出發前，伊健原本心情相當興奮，因為自2019年到過三藩市巡唱後，已有四年時間未有跟當地歌迷見面，而洛杉磯更是他入行以來，首次踏足演出，只可惜完成三藩市站巡唱後，伊健的身體漸漸感到不適，開始有感冒病徵，計與當地天氣比較乾燥、加上時差和舟車勞動，難免影響身體狀態，到達洛杉磯後，伊健盡量留在酒店休息。
正式開show，伊健在洛杉磯演出期間，為自己的表現未能做足一百分，在台上向觀眾致歉，他說：「同大家講個唔好嘅消息，但可能有啲人都發覺到，其實我第一次嚟呢度（洛杉磯）開演唱會，我好興奮，但幾日前，我患病了，對唔住、對唔住，不過唔緊要，病係可以控制，我會盡我所能，你哋可以放心，三年嘅疫情我哋都過到，呢個病唔會難到嘅，今晚我要做好呢個show。」
帶病上台，伊健全靠意志力刻服了整個演唱會，能夠完成兩站美國巡唱，伊健相當感謝台前幕後付出的努力，而今次有份跟着大師兄巡唱的Feanna，除了擔任嘉賓演出，還加入了和音團隊。她說：「我第一次去美國，勁開心，多謝伊健，我有讚佢好靚仔，哈哈！同埋今次呢個trip，我見識咗好多，又有機會去環球影城同埋迪士尼，仲食咗好多日牛扒，食到勁飽。」