無綫劇集《逆天奇案2》昨晚（5日）一集單元「龍頭棍風暴」完滿落幕，偷走龍頭棍的真兇正是賀堅（姜大衞John哥飾）本人，目的原來是為了孫仔！賀堅不欲黑社會背景影響到乖孫的成長，因此設計一場大龍鳳將龍頭棍偷走，欲打退兒子賀永權（林景程飾）爭做龍頭的野心，希望一家人移民外地展開新生活。可惜永權被權欲熏心執意爭做龍頭，與死對頭耀星（翟威廉飾）鬥生鬥死，兩人在貨櫃場打大出手，永權更差點取了耀星的性命，最終森Sir（陳展鵬飾）趕到現場成功阻止悲劇發生。
林景程與翟威廉的打鬥戲雖然只有約1分半鐘，但拍攝過程絕不簡單！官方釋出相關場口花絮片段，翟威廉拿刀揮斬景程時，屋頂其中一塊天花意外落下，並狠狠擊中威廉的額頭，幸好威廉並沒有大礙，休息一會便重新投入拍攝，非常專業。拍攝當日正值33度高溫，穿着長袖的兩人不但要奪命狂奔，還要瘋狂埋身肉搏，兩人賣力演出拍到身水身汗。
由方力申飾演的天才生物學教授唐冠峰理性大於感性，事事都以科學理論來解釋，甚至於覺得「愛情」都是假的，Alex將角色的「直男特質」演繹到位。Alex受訪時透露靠幻想代入角色：「角色細細個就被老竇帶去荒島做科研，童年淨係得讀書同做研究，我嘗試用屋企嘅情況套番落角色，如果我老竇淨係同我講運動，搬去一個地方淨係練水，日日都係咁練，我都會感受到呢個痛苦，用呢個感受代入番個角色。」講到劇中要面對大量繞口劖手的專業術語對白，Alex透露獲視后檔林夏薇傳授秘笈：「薇薇教我可以錄低再翻聽，呢個方法啱晒我，因為每日都要揸成個幾鐘頭車，呢個方法好處係去到邊都可以聽，好似聽廣播劇咁，仲有可以聽番覺得演繹得好唔好，如果唔鍾意呢個方法就再錄過，確實幫咗我好多。同埋劇中有好多專業術語同埋英文，所以事前都要做足Research。」
劇中Alex直男指數爆晒標，問到他現實中的愛情觀時，他笑言：「感情方面唔係好識講。我覺得人大咗就會體會到，你覺得自己做得好時，可能人哋會覺得唔好，最緊要係對方覺得你係稱職嘅伴侶先係最緊要。」劇中Alex不時會大顯廚藝，問到現實中有否和女友玩煮飯仔？他笑謂：「大家都好忙冇乜時間煮嘢食，同埋對食嘢嘅要求都好易滿足，煮熟就得。」
