真人競技綜藝show《識貨》今晚播出首集，節目由鄭裕玲帶領兩名小鮮肉鄭衍峰和孔德賢主持，8位「見習主播」陳自瑤、黎諾懿、陳嘉佳、何遠東、黃建東、蔡國威、路芙及黃頌明需要在完全沒有劇本的情況下，靠口才、急才及轉數等說服現場觀眾購買其推銷貨品。
出名要求高的Do姐會即場俾意見外，現場顧客同商家評審團亦會根據藝人表現即場進行批評及讚賞。在《好聲好戲》中奪冠兼贏盡好評嘅陳自瑤（YoYo）為咗挑戰自己亦有報名參賽，不過壓軸出場嘅時候太緊張，全程驚到騰騰震，亦未能喺限時內完成整個Presentation，遭顧客代表狠批：「真係成分鐘都唔知你賣乜，平時見到咁我係會『碌』走你。」商家團則直指YoYo沉悶。
出師不利嘅YoYo除淚灑鏡頭前，返回後台亦繼續崩潰爆喊兼自責：「我真係做得好差，我諗我好多年都冇嗰種挫敗感。唔係我強項，真係唔知點算，對自己好失望。」由於YoYo表現激動，Do姐亦出言安慰。