擁有愛犬Lucky的許志安，明白動物擁有一種能療癒人心的能力，日前就提議帶同「香港動物輔助治療學會」的三隻治療犬「淡定哥」、「不不」及「Tiger」，到元朗老人院進行探訪，齊齊氹吓老友記開心。
起初有部分老友記未敢與治療犬接觸，但最終都被牠們熱情所融化，更有長者主動要求餵牠們食零食，安仔還在旁唱粵曲助興。
除了唱歌、傾偈，安仔當然陪陪太子讀書，打吓麻將，竟然接二連三地自摸，去到最尾一鋪牌，仲連續自摸了兩次冧庒，為免令老友記失望，安仔決定棄糊，最後更「出統」，他說：「我一向冇賭運，剛才反而係咁自摸，我算用心良苦，為咗令佢哋開心，贏牌變輸牌，哈哈，剛才打牌過程中，我有同老友記傾吓偈，問吓佢哋平日幾點瞓，有乜嗜好？有義工、治療犬關心固然好，但只係錦上添花，家人嘅關心先係最重要。」
原來眾人閒聊之際，竟然有位婆婆突然問安仔：「你以前係咪同鄭秀文一齊？」眾人即哈哈大笑，安仔亦大方回應說：「依家都係喎，乜你咁八嘅？咁你知唔知羅家英同邊個？劉浩龍同邊個？沈震軒又同邊個？」氹得現場笑聲不斷！