張敬軒紅館演唱會昨晚除夕夜來到第七場，倒數前由MC $oHo & KidNey及Kayan9896擔任嘉賓。軒仔與觀眾一起倒數，迎接2022年的到來，之後又全場大合唱《倒轉地球》，氣氛熾熱。
倒數後，七師傅出場擔任壓軸嘉賓，觀眾情緒高漲，整個紅館傳遍震耳欲聾的歡呼聲，之後軒仔與七師傅展開一段令人捧腹大笑的對話。
軒仔：大家見到我未婚妻咁開心‥‥‥
七師傅：吓，我哋乜都未做過喎，咪好唔抵囉。
軒仔：你又講得啱，但係我好保守，有啲嘢，我要結咗婚先做‥‥‥你今日綵排叫我咩話？你記唔記得？
七師傅：老公‥‥‥唔係‥‥‥軒公
軒仔：我今日聽到呢個字，個心離一離，新年流流‥‥‥
此時此刻，七師傅已悄然無聲地牽着軒仔的手。
七師傅：你隻手咁凍，你係咪嚇親？做足18場，日日咁唱係好辛苦。
軒仔：你帶溫暖俾我咪得囉，你有咩秘方教我補吓身？
七師傅：下一世唔好做歌星啦，太辛苦啦！做國王算啦你。
軒仔：吓？國王後宮佳麗三千，我個腎點搞？
七師傅：你只獨愛一個咪得囉。
七師傅擔任表演嘉賓，當然要高歌一曲，她選來鄧麗君的《月亮代表我的心》，表達對軒仔的愛，之後觀眾更起哄，大叫軒仔「咀佢」，但他似乎聽不清楚。軒仔問：「咩話？娶佢？哦‥‥‥咀佢！」七師傅一臉認真：「我OK㗎！」但軒仔用疫情來推卻，豈知七師傅竟說：「但係你聽吓佢哋啲聲，所以我希望疫情早啲退啦！」軒仔知道盛情難卻，便問：「錫塊面得唔得呀？」七師傅說：「錫邊度都得！我唔會諗啲邪嘅嘢。」當軒仔獻吻後，七師傅又發功，「使唔使回禮㗎？」把軒仔笑彎腰，笑說：「呢啲嘢一不離二，二不離三，嚟啦！」
軒仔得到七師傅嘴唇加持，笑言今年一定好運過人，又請她指點來年運程，七師傅回答：「我計過你條命啦，西面最適合你，你一路向西啦！成個紅館都係西面，我俾個錦囊你，你帶睡袋行李搬來紅館住啦。」接着，七師傅拿出一個垃圾袋，送上一個能量塔，「我本來想送層樓俾你，但係我又驚爆緋聞，啲人話我包養你，所以我用好長時間，自己親手做份禮物俾你，個垃圾袋係因為出嚟太趕啫。」七師傅以一貫語出驚人的話，再度引發哄堂大笑。
