衛詩（Jill）岀道17年，終在昨日（17日）於九展舉行處女演唱會，更獲多位圈中好友包括Jace陳凱詠、陳蕾、洪嘉豪、鄧萃雯、泳兒、鍾舒漫、鍾舒淇、陳明熹、Howie@Dear Jane、Kiri T、Jude曾若華、鍾雪、Miss Yellow等現身支持。Jill甫一開場即以型格曲風《GET OUT》為演唱會揭開序幕，頓時尖叫聲四起。及後更演唱多首 經典快歌《Funny Jealousy》、《可可》等等。獻唱《可可》時，音樂製作人 Chris Polanco陳杰更驚喜現身合唱，歡呼聲四起把全場氣氛推高。
Jill亦邀請了相識多年的音樂人Daniel Chu作嘉賓，分享他們相識多年點滴，Jill分享他們十多年前的台上表演合照時要求Daniel與她模仿當年合照中的動作，更著歌迷替他們拍下！途中因Jill用右手揸咪與相片不符，台下瘋狂大叫「左手呀！」最後Jill聽到台下的洪嘉豪「提水」，在台上大叫「多謝嘉豪！」場面非常搞笑！
Jill在演唱會當中首次在台上演唱Big Band成員 太陽的歌曲《Eyes Nose Lips》，給一眾樂迷一個大驚喜，唱罷更說: 「啱啱唱完韓文歌好掛住媽咪，可惜佢今日嚟唔到，不過唔緊要，爸爸今日有嚟到！一定會有下次！」
最後當然少不了家姐衛蘭（Janice）上台支持細妹，Janice笑言：「終於等到你邀請我做嘉賓啦！我真係好開心！好開心你舉行個人演唱會，好想趁今晚同你講，知道其實你一直以來嘅音樂生涯都好需要好多嘅忍耐同堅持。喺你身邊，除咗睇到你會有失望唔開心嘅時候，更加睇到你嘅耐性。無論有幾多嘢阻住你向前行、要等幾耐，你都會好似一個戰士咁繼續向前，繼續努力，呢個係我喺你身上好想學到嘅嘢。今晚我真係好戥你開心，亦都好感恩我哋依然有機會一齊企上舞台，陪着對方同行。」
二人感觸相擁落淚，Jill亦說：「我真係好多謝家姐你一直支持我鼓勵我，我簡直覺得你係上帝賜比我既禮物！」非常感動！說罷二人用紙巾拭淚，場面一度靜止，Janice為緩和氣氛說： 好！不如我哋唱歌！ we are a mess ！引來樂迷大笑！最後和Jill獻唱他們兒時喜愛的卡通片歌曲《If We Hold On Together》及二人的合唱歌《細細個》。其後Jill再為觀眾帶來多首感人作品，最後安哥再出場跟全場大合唱《感情需要》為演唱會畫上完美句號。
