衛蘭（Janice）一連三場 《BE STILL LIVE 2022演唱會》昨晚（9日）於紅館展開，相隔四年再踏紅館開騷，歌迷等到頸都長，所以昨晚當Janice一升台，已經萬眾歡呼掌聲滿瀉紅館。
Janice以一曲《生涯規劃》為演唱會揭幕， 神祕黑白女皇長裙加上閃石面罩升上來之後，觀眾歡呼聲不斷，接著她一口氣唱了《如水》、《驗傷》、《運動詩歌》等等，滿足大家浸浴在她靚聲洗禮後，才開口跟歌迷打招呼，Janice深呼吸笑住話：「感受吓你哋先！」觀眾即報以歡呼拍掌雷動，她開心笑道：「頭先好緊張，因為好耐冇上台唱歌。今晚呢個演唱會希望大家可以暫時放低你哋煩惱，盡情放鬆一晚，我好緊張，但 ok ，我唱幾首歌就ok 啦。哈哈…..」
昨晚 janice 請來鄭中基打頭陣擔任嘉賓，Ronald升上來時，整個紅館熱烈歡呼升到最高點，觀眾開心歡呼叫聲，連Ronald及 Janice 也為之震憾。兩人合唱《心亂如麻》之後 Ronald給Jancie一個大大的擁抱，恭喜她開演唱會，而Janice就怕怕羞咁不停話，「我好緊張，好緊張呀…..好多謝你來做嘉賓。我想同你合作好耐㗎啦，個陣你唱我個首《十個他不如你一個》……所以我今晚好緊張，好開心認識到你。」Ronald就笑住話：「我都估唔到你請我做嘉賓，多謝你請我嚟….哈哈。我都好想搵你一齊唱《十個他不如你一個》。因為我覺得首歌好好聽，好想唱，但係又唔夠膽問你，所以我咪自己唱囉。」Ronald再獨唱《My only one》。最搞笑係獨唱之前，佢同觀眾話，「又到咗『匪疑所思』時間，觀眾即刻開心起哄叫他講匪夷所思笑話，不過Ronald就話「都係去我個Channel聽我坐係到讀信啦 ，依家我企係到，都係唱歌啦！」
此外，Janice昨晚亦邀請了5位好姐妹：Sherman 鍾舒漫、Sukie 鍾舒祺、 Shimica、 Reanne以及妹妹Jill衛詩一同分享她的舞台，合唱《所以我愛》《joyful joyful》等歌，鍾舒漫更閃著淚光分享了自己之前不知何故失聲一段很長日子的故事，不能唱歌令她似失去人生價值非常痛苦，多謝Janice一直義無反顧話等佢一齊上台，不停給予鼓勵，她才可以康復，場面感人。
演唱會尾聲，janice以《大哥》作最後一首歌，但歌迷全部不肯離場，不停安歌再安歌，結果Janice 一共安歌了四首歌: 《就算世界無童話》、《My love My face》 、《愛你還愛你》等等，歌迷才依依不捨離去。