闊別銀幕9年，對上一齣是2013年客串的《狂舞派》，為怕演技生疏，今次特別找來專業acting coach導師幫助入戲。「我又唔覺得話係咩復出，依家想拍一啲有訊息有意義嘅電影。」玩票性質，最緊要有訊息、做得開心，49歲葉藴儀最近更進軍YouTube界，拍片講MIRROR又談兩餸飯熱潮，夠晒貼地氣。
在《正義迴廊》演一個退休教師，其實開過藝術學校辦過不同展覧，藝術家身份的葉藴儀，也真是個教師。她笑說：「我自己都係藝術方面嘅老師，不過就未去到退休囉！有啲粉絲喺我個page留言，話『你點似一個退休老師呀？你咁嘅年紀！」我覺得又冇乜所謂嘅！」
當日，是《正》片新導演何爵天，傳訊息到葉藴儀的專頁，說監製翁子光想找她演出，葉藴儀看過劇本後，二話不說接下。「我覺得呢個導演好唔同喎，拍攝手法同埋設計編排，都係好唔同一般香港電影手法。我以前拍電影，可能都係飛紙仔，去到你先知要做啲乜，今次第一次見我嘅時候，我都大概睇過個劇本，乜都ready晒，所以我覺得好值得有咁多好嘅評論！」有訊息，令人反思的主題，最令葉藴儀感動。戲中最擲地有聲的一句「冤獄比放過一個有罪的人更不公義！」，成為網民廣傳的對白，也如葉藴儀所說，戲中有很多令人反思的訊息。
專人教戲幫咗好多
葉藴儀對電影其實一點不陌生，她13歲已經被星探發掘拍廣告，1988年與元彪合演的《孔雀王子》一炮而紅，在港台日韓等地大受歡迎，紅到進軍日本市場，更出過日文碟。一臉可愛無害的娃娃臉，好早已成功衝出香港。不過，葉藴儀說，從來不會重溫自己的電影演出，對少女時代的記憶已很糢糊，「我對少女時代嘅印象好模糊，可能自己太細，其實就係遊魂，好懷念可能就係嗰種好隨性，公司又冇咩壓力，都係由得我自由發揮，只係人哋可能框架咗，覺得你好得意或者你好靚，但係我細個唔覺得自己好得意，我其實比較男仔頭性格，不過我個樣好女仔。你話靚唔靚，細個唔識呢啲嘢，哈哈！」
藝人與藝術家，葉藴儀說兩個身份都OK，「我兩樣都係囉，因為你一日做咗藝人，係唔可以甩㗎！」2019年出的「寫真」，葉藴儀強調是影集，只是她其中一個art project，期間卻閙出版權官司，早前更有說她將會拍下更大膽的？「依家個官司就完咗，我攞返晒所有相片版權。當其時我唔係想影一個乜嘢突破寫真集，呢個係我一個藝術project，同女性主義有關，去講一啲message。你用一個娛樂角度去睇會覺得，嘩，點解你會去做呢啲嘢？你會唔會下次再大膽啲？大唔大膽，只不過我係想有一個訊息帶出來，想人哋去反思呢樣嘢啫！」
揸機拍片開YouTube
終於可以做多些「自己嘢」，除了藝術工作，最近正在學習日本花道和水墨畫等，也因為疫情，開了另一瓣，當了YouTuber，自己揸機拍片學埋剪片。「就係因為疫情，我覺得要做啲嘢，我個意思係郁動，唔係話要攞啲乜嘢，我就諗吓不如去拍YouTube Channel啦，又冇乜蝕嘅，等人哋睇吓自己又有啲嘢，起碼每個禮拜都會諗啲嘢嚟做，唔好話擺喺度吽啦！」
9個月前正式開頻道，最初講藝術談文化，之後擴闊話題，講吓MIRROR又講兩餸飯，「唔好理有冇人睇先啦，哈哈！起碼我可以踏出一步，離開自己comfort zone去做唔同嘅嘢！我唔係鏡粉，不過貼地啫，我覺得大家都鍾意MIRROR，我都要知道MIRROR係乜水先得㗎，我唔係MIRROR嘅特別粉絲，但係我都識邊個係姜濤、邊個係Jer呀！」十二子當中，她最愛Jer（柳應廷），「我都會欣賞阿Jer嘅歌囉，同埋佢啲詞，我覺得佢啲歌有深度！」如果有機會演Jer阿媽唔介意？「應該可以啩，我個仔都廿幾歲啦，我大前提考慮接任何嘢，都要有發揮同埋有意思有message。」
下年迎接50歲人生下半場，葉藴儀說已經習慣一個人生活。她1995年閃嫁玩具商人陳柏浩，可惜婚姻只維持了5年，離婚後獨力養大子女，一直是個稱職單親媽媽，「我慣咗一個人咁耐，未必會特登要去搵個伴囉！冇乜追求者喎，呢個疫情，大家都冇咩出嚟啦！我非常enjoy自己一個人，想做咩都得，唔使要諗另一半，我會唔會阻到你呀，或者我成晚留喺studio做嘢，會唔會忽略咗你呀。長遠來講，你問我要唔要（伴），我唔可以答你，因為我依家都唔知！」
上半場過得很精彩，下半場，留多一些給自己、給香港。「下半場擺多啲時間係自己創作，如果有一啲適合嘅電影角色又有message，我都會想做。」關於移民，葉藴儀好肯定的說：「我係留低嘅人，就做留低嘅嘢啦！留低嘅人，梗係愛香港先至會留低，唔代表我唔會去第二啲地方，去旅行我係會去。我留得喺香港，梗係為呢一笪地方做一啲貢獻啦，係咪先？例如可以拍到一套咁好嘅港產片！」