草蜢睽違台灣13年再次空降台北小巨蛋，上周末（18日）舉行《RE: GRASSHOPPER 草蜢巡迴演唱會》，作為今次世界巡演的首站。除全場爆滿外，好友張小燕、蘇慧倫、范曉萱、羅時豐、許富凱、曾國城、小鍾和李聖傑等捧場。37年前草蜢初到台灣工作，獲小燕姐、羅時豐、許富凱和曾國城等前輩藝人愛錫和支持，所以當晚蔡一傑在台上看見他們在VIP席，手舞足蹈投入睇騷，立即感動爆喊。Encore時草蜢即興邀請他們大合唱《愛拼才會贏》，最後以《我們》一曲作結！
完騷後草蜢接受訪問，台上爆喊的傑仔說：「其實一開場我升上台就想喊，太感動，Fans嘅歡呼聲由咪高峰傳入我耳機，好震撼，但我強忍住。」看到台下小燕姐時終於忍不住，他說：「諗返當年草蜢初到台灣好陌生，有佢哋好好照顧和愛錫我哋，好多回憶，特別感動。」蘇志威說：「平時小燕姐和曾國城佢哋都好早瞓，竟然喺台下又唱又跳玩到完場，好難得！」蔡一智說：「全場都好似18歲咁有活力，而且有好多新Fans，我見到好多幾歲嘅小朋友喺台下跟住跳。小巨蛋舞台好適合草蜢表演，希望好快可以返嚟開Part 2。」
