苟芸慧早前為代言的地產按揭公司拍攝新一輯廣告，疫情下依然狀態大勇，即使拍足12小時仍精神十足，期間她以多個造型上陣，無論是住家look或是女強人造型，都散發出女神的陣陣仙氣。
新型冠狀肺炎疫情持續，苟姑娘認為疫情對她最大的影響，是未能飛返加拿大見屋企人，「本身打算返加拿大，因為爹地、媽咪、細佬都喺嗰邊，好想返去見佢哋，但可惜而家飛唔到；我亦好想去旅行，唯有睇旅遊節目當去咗，有時播緊旅遊節目，我會叫老公幫我喺電視機前影相，當去咗。」
今次難得在疫情下開工拍廣告，苟姑娘表示非常感恩，問到出門拍攝可有做足防疫措施？苟姑娘即沒好氣表示：「我老公（陸漢洋）超級緊張，反而我就隨遇而安，我覺得大家戴口罩、量體溫、用消毒搓手液洗手，已經好安全，但我老公就緊張到會買啲垃圾袋嚟笠晒啲櫈、舖晒啲枱，搞到好唔方便，我明白佢嘅出發點為我好，但有時似乎過分緊張吧。」
她指在疫情期間，除了閒時跟老公打機外，亦大玩HITT（High Intense Interval Training）運動及研究生酮飲食，另外亦會趁空檔入廚整蛋糕，「留喺屋企都會做自己開心嘅嘢，例如整蛋糕，不過老公唔食甜嘢，整完都係攞落樓下請清潔姐姐佢哋食。」問到有否打算做生意開甜品店，苟姑娘表烈：「有打算開班授徒，將自己識嘅嘢教畀人，等佢哋又可以整甜品畀身邊嘅人食，係一件好開心嘅事，所以我都有同朋友商量，待疫情過後，租個地方輪流教學生。」