電影《臨時劫案》將於今個農曆年上映。今日（25日）電影推出十多款驚喜海報，除了有郭富城（飾演梅藍天）的騎呢打劫look，還有任賢齊（飾演冇用輝）的驚青走佬造型，林家棟（飾演笠水）更將其演繹的貪婪怕事的士司機角色，演得扺死啜核；其餘海報還有戲中飾演大賊、小賊的父子檔姜大衛和姜卓文，飾演家棟老婆、鮑起靜新抱的胡定欣。
飾演大肚婆的胡定欣，其角色經常被奶奶激到情緒高漲，定欣表示：「拍攝時嗌到成條邨都聽到，放盡嚟嗌。」定欣說好開心第一次與家棟合作，雖然說話不多，但感覺到對方是個細心好拍檔，「我哋本身唔認識，但係佢都喺旁邊提點我，帶我入戲，而今次我入行同鵬哥（盧海鵬）第二次合作，上次係十幾年前，今次好開心且同鵬哥、家棟、鮑姐合作。」
姜大衛透露今次有份參與演出有多項原因，「呢部戲係我細佬（爾冬陞）監製，部戲又有郭富城、林家棟、任賢齊，又有我個仔。導演講故事俾我聽，我係接賊贓，幫壞人租槍、租打劫器材，個人計算又縮骨，自以為好叻，所謂老闆仔，唔係好人，自己感覺好似破壞咗自己幾十年形象。有場戲幾搞笑，留待大家去睇，有一個中槍鏡頭，我以為夠位，點知跌落去撞親個頭，好彩頂帽遮住，如果唔係就會爆缸。」姜卓文則說與爸爸合作好開心，「之前都合作過兩次，我哋拍過廣告及小製作，比較多對手戲，而今次比較少，但喺現場見到佢做戲，佢又見我做戲好開心。」姜大衛說：「我哋今次ending戲一齊拍攝，亦係今部戲唯一同場，估唔到仲要係槍戰，好彩導演冇安排我打死佢。」姜仔不孝笑言：「好可惜導演冇安排我打死佢。」
