聲夢傳奇｜炎明熹對奪冠得一半信心克勤約定10月打邊爐

無綫歌唱比賽節目《聲夢傳奇》今晚舉行決賽，姚焯菲（Chantel）因賽前病倒未能出席噚日嘅綵排，導師之一嘅泳兒表示Chantel已經係第2次病倒，相信可能係因為太緊張而致病。

冠軍大熱炎明熹（Gigi）表示對奪冠暫時得一半信心，要視乎臨場狀態。不過自言綵排狀態ok，認為去到呢個地步已經唔需要再去諗失準問題。而被觀眾稱「Sammi接班人」嘅鍾柔美（Yumi）自言只有6成信心，自覺仲爭啲嘢，希望可以喺決賽上做到最好。

至於因北上擔任《中國好聲音》導師而離開香港嘅李克勤，今日都喺IG出post幫《聲夢》學員打氣。克勤表示雖然唔喺香港，但佢有遙距參與最後兩集《聲夢》製作，學員選歌、綵排佢都有睇。希望大家可以透過今晚嘅決賽好好享受《聲夢》舞台，發揮自己最好水準。最後佢同《聲夢》學員講：「你們也是好聲音」，仲預告10月約大家打邊爐、唱K。