黃夏蕙一年一度搞大龍鳳，幫老公潘炳烈擺壽宴，除咗送九十九枝玫瑰，仲開心送咀嘴，BB開心話：「幾十年前，老公追我時送玫瑰花，依家輪到我送，我都是第一次送花俾老公。」
不少好友包括祥嫂、魏秋樺、邵音音、江圖、徐寶鳳、苗金鳳、梅艷芳媽媽在阿仔梅啟明陪同下到場，劉錫賢、陳維英和陳靖允擔任司儀。
夏蕙BB年年搞派對，場面年年都非常混亂，因為周圍派帖搞到現場人頭湧湧，今年壽宴加「夏蕙慈善基金」就職典禮，單是會長、會董、名譽會長就有七十幾人，上到台連位都冇得企，謝偉俊混亂中為眾人主持就職宣誓。
今晚壽宴擺足八十五圍，請帖印埋銀行帳號叫大家捐款，現場仲有好多捐款箱，希望大家踴躍支持，不過現場繼續七國咁亂，好多賓客來到，捉住夏蕙BB投訴買咗枱又冇位坐，投訴之餘不忘爭取合照，搞到BB被人扯來扯去，BB話：「唉！亂過亂世佳人，冇辦法，今晚過千個來賓，場面一定好混亂，搞咗幾年大家都慣咗啦！亂代表熱鬧，大家都係俾面我啫。」
夏蕙BB與時並進，搵到一間網絡公司幫佢搞網上直播，因為就職禮後要籌款，人人可以上台唱歌，但唱之前先捐二千元，BB號召力十足，不少人扮靚靚排隊等上台，又有好多贊助商送出禮品，在晚宴期間進行拍賣，問夏蕙BB有冇籌款目標？佢話：「當然是愈多愈好，希望大家有錢出錢，有力出力！」