元旦日首奪《叱咤》女銀的泳兒（Vincy），昨日（8日）獲歌迷會舉行小型聚會為她慶祝，Vincy更近距離跟歌迷互動。
聚會一開始，Vincy先到台上感謝歌迷多年來的支持，隨後立即進入遊戲mode，玩「大電視」及「估歌仔」時，歌迷十分踴躍，全場氣氛立即熱鬧起來。期間，於同一場地工作完畢的糖妹，正準備離開時，更特地向Vincy恭賀一番並合照，Vincy透露：「我哋係同月同日生日㗎！」
之後，歌迷送上蛋糕及香檳，Vincy更帶同獎座跟歌迷分享喜悅，又逐一跟他們簽名、合照及聊天；而壓軸抽獎環節，Vincy更親自準備禮物：「頭先啲禮物係fans club準備，嚟緊嘅禮物就係我自己準備，總共有十份，因為就嚟新年，所以我哋今日係抽利市！裏面係有現金嘅！七份係銀獎、三份係金獎！」
最後Vincy表示希望新一年，大家可以在歌迷會內玩得開心，找到歸屬感：「可能今日大家都唔識，但唔緊要，希望呢度你哋可以互相認識，因為大家都係鍾意我㗎嘛，係咪？呢度志同道合嘅朋友可以識到啲新朋友，或者識到另外一半啦，哈哈！呢件事係幾開心嘅，我依家就變咗媒人咁啦，哈哈。最緊要希望大家玩得開心，我哋一齊努力，希望以後我哋多啲時間搞到啲活動。」