馬浚偉領軍的舞台劇《男人40 CEO》經已圓滿落幕，首次做舞台劇女主角的黎瑞恩於完騷後大寫千文字感激各位一年來的教導和鼓勵，更大爆馬仔搵佢做女主角嘅原因。
黎瑞恩喺千字文提到，最初馬浚偉搵佢做女主角，佢唔係一口答應，而馬仔想搵佢合作原因好簡單，就係想搵一個唔係扮善良，而係真善良嘅人嚟演朱秘書一角。考慮咗一段時間後，黎瑞恩終於願意突破自己，答應參演舞台劇。
另外，黎瑞恩仲多謝各位幕前幕後工作人員一直以來的提點和照顧。
《男人40 CEO》除了有馬仔和小恩子外，主要演員還有林子博、潘嘉駿和沈穎婷。
黎瑞恩全文如下：
10場《男人40 CEO》舞台劇尋晚終於圓滿落幕，不知不覺呢一年來嘅感情喺謝幕時候忍唔住流露咗出嚟添。
諗返起第一日接到馬生嘅電話，佢話想邀請我做朱秘書嘅角色，我都考慮咗一陣先至答應。最後點解我會應承呢？馬浚偉話：「我唔想搵一個本身唔係朱秘書性格嘅人來扮演呢個角色」（註：佢嘅意思係要搵心地善良嘅人，唔要扮出嚟嗰隻）而且見自己未做過舞台劇喎都想試吓呀。
原來做舞台劇對我來講真係好大壓力㗎，尋晚完成最後一場，今日終於可以好放鬆咁覺瞓到11點幾先至起身。喺呢一年以來，斷斷續續咁排練，尤其是喺演出前一個月，幾乎每日不停綵排，由中午12:00-晚上11:00，每日凌晨4點幾先瞓得着覺，晨早7點就唔知點解會起咗身，仲有呢段日子經常性發同一個夢……台下全場滿座，個個都望着我，我猛咁話：「我未背好台詞呀，唔出得去。」跟住就俾人推咗出去舞台中間，但係我又唔記得哂d對白，跟住台下觀眾係咁笑我……呢個惡夢發咗好多次呀，每次紮醒，我都好驚好驚，我愈想背，我就愈唔記得，背咗第一場，就唔記得第三場，背熟第三場，又唔記得第八場；再背熟第八場，就輪到第三、四、五、六場完全唔記得…..呢種感覺好徬徨、好迷茫、同好驚呀，都唔知點搞！點收科好！我自己最驚最怕就係連累到人。
點擊睇更多黎瑞恩靚相：
直到正式入場館踩台嗰日，我好驚惡夢成真，我唔想好似發夢，一樣俾台下觀眾指著我嚟笑。平時唱歌失誤，最多咪再嚟過，絕對唔會連累人。不過，我會唔開心幾日，但係舞台劇要同其他人合作，對手接唔到咁點算呢，舞台劇係冇NG㗎……所以我覺得好大壓力，到咗呢個年紀真係有啲頂唔住。
終於我順利完成咗10場演出喇，如釋重負，我從來唔會強迫自己去做我唔想做嘅事，不過，依家至發現原來我係要俾人迫先會做到，個個都同我講：「你第一次做，所以好有驚喜！」其實真係有好多做得唔好嘅地方，仲有一場發咗瘟添，但其實我係唔能夠接受㗎，不過無論如何最後一場都終於圓滿落幕，多謝各位到場支持嘅所有觀眾、朋友。
真係要好認真咁好多謝馬浚偉先生，咁夠膽搵我做女主角，又教咗我好多嘢，你真係塞咗好多錢入我個袋度呀；仲要多謝釗鑫成日教我點記台詞，點樣可以演繹好啲；多謝王嘉翊Garrick 經常抽時間幫我補課；仲有多謝每一位演員及幕後各位小朋友嘅包容、照顧，再見喇舞台劇，我以後會喺台下欣賞各位戰友嘅精湛演出，希望大家繼續good show。
圖片來源：黎瑞恩、馬浚偉＠Facebook
