炎明熹（Gigi）首個個唱《炎明熹Gi-FORCE演唱會》原定昨晚（8日）於九展舉行尾場，但受颱風「小犬」影響，主辦單位昨晚宣布個唱將延期舉行。她之後在IG放了一段錄音，表示為尾場延期令粉絲失望感到不開心，承諾下一次開騷做得更加好！
Gigi說：「好想同第二場觀眾衷心講一聲非常抱歉，因為颱風關係，冇機會睇到我演出，我都知道好多朋友專登喺世界唔同地方，飛嚟香港睇我表演，令你哋失望我都好唔開心，因為我希望每一位朋友、每一位支持我咁耐朋友，都可以睇到我第一次表演。喺噚（前）晚5 part表演，每一part我都印象深刻，首先就係大家俾我力量，其次好多謝樂隊嘅老師們及跳舞嘅老師們，俾到我一個咁好嘅諗法。」
Gigi又提到前晚（7日）個唱，請來梁詠琪擔任演出嘉賓，一起合唱歌曲《我鍾意》覺得好開心︰「好多謝噚（前）晚嘉賓大Gigi（梁詠琪），估唔到我前排唱咗Gigi嘅《我鍾意》及同Felix（林智樂）合唱嘅《短髮》，之後我有機會見到真人，非常榮幸亦都好開心，最後我想講雖然今次演唱會有好多地方做得唔足夠，但我相信喺上天安排，俾我有更多時間準備好自己、裝備好自己，等我下次再開演唱會時，可以做得更加好。」