無綫遊戲節目《濠玩夏水禮》明晚（18日）播出一集，有「喪玩隊」的Bob、劉溫馨、黃美棋、傅嘉莉和楊潮凱，決戰「好玩隊」的金剛、朱智賢、黃婉恩、阮兒和陸浩明。
今集首個遊戲「美人魚擺尾」勁有睇頭，一班靚女齊齊戴假髮穿魚尾，化身索爆美人魚！遊戲玩法是每隊輪流派出「美人魚」隊友鬥擺尾，擺得愈多為之勝利。遊戲非常考驗體力，一班靚女辛苦到面容扭曲，當中美棋BB表現最為亮眼，人仔細細化身小金魚頭搖又尾擺，最終獲得超驚人高分數。
之後的遊戲「攀石鐵人」亦笑料十足，玩法是兩隊進行攀石比賽，爬得愈快愈高為之勝利，身形瘦削的6號甫開始已經手震，最後連第一階段都未完成便跌落水，看不過眼的Bob即時窒爆：「好廢呀！」
「音樂更衣室」同樣過癮，玩法是參賽者先要穿上10件衫，之後伴隨音樂逐件脫下兼擺出指定動作，除得最多衣服組別獲勝，做過Model的傅嘉莉甚有優勢，她不單止除衫除得最快，除到興起更險些連原本穿着的T-shirt也除掉，場面搞笑。
劉溫馨、朱智賢則於「瞓地運水」齊齊變豬隊友，朱智賢表現遴迍有破壞冇建設，令金剛嬲到想趕她去隔籬隊；劉溫馨同樣雞手鴨雞，令胡亂潑水的Bob勁勞氣：「佢起碼有八次直接倒落我鼻哥窿度！」
