都市人生活壓力大，每日上班工作已夠晒辛苦，遇着個衰老闆又要睇佢面色，最鍾意臨放工叫你開會 follow up 又要開機再做過。放工返到屋企開着個電視都係為咗鬆一鬆，筆者最期待的畫面除了是令人感到浪漫滿屋的美女帥哥愛情橋段之外，其實暗啞底好鍾意睇高潮疊起嘅嘈交戲…..有時見到反派衰人欺負主角，真的很想說一句「喂，忍夠你喇吓！」看到有角色真的如你所願，吐出霸氣台詞，成個人爽晒，以下呢幾幕就係令我最舒暢之作！
《溏心風暴》系列劇情編排細密，對白句句精，無論是第一輯還是第二輯，一樣出晒名內含大量潛力 cap 圖。《家好月圓》中最犯眾憎的當然是喜歡說謊陷害人的路嘉美（徐子珊飾），任性、奸詐、自私精，由登場開始已經惹來萬千嬲嬲。這一幕，發生在第 35 集，嘉美瞞着阿圓（黎諾懿飾）懷着別人嫁給他，卻意外被荷媽（李司棋飾）害得流產，便乘機指控荷媽，最終連親媽媽 Sa 姨（關菊英飾）都睇唔過眼，戳破他的謊言，更怒打嘉美教吓女，大呼「你仲要誣捏」以正視聽！
《鐵馬尋橋》是一套民初武打劇，講述「榮家」和「顧家」兩家人因十多年的事件而引發的恩怨情仇，肉緊劇情由頭帶到尾，每宗事件足以令觀眾睇到咬牙切齒，直頭代入埋角色當中。反派榮家財雄勢大壓榨人，顧家則不斷被欺壓陷害，但人往往就是處於絕境時，反擊來得更有力量。顧家幫中，乖巧的阿雁（唐詩詠飾）被榮萬鈞師父譚忠（李天翔飾）強姦後，譚忠得榮家包庇，顧家人就帶同武術界中人前去捉拿犯人，對白句句有力，讓人看得過癮非常。
《巾幗梟雄》唔止得柴九四奶奶嘅，其他角色一樣有睇頭！筆者今次選的一幕亦是弱勢角色的逆襲反擊。三奶奶（惠英紅飾）在劇中一直非常溫婉，自嫁入蔣家都忍氣吞聲，但咩都可以忍，連累到個仔就無情講，誓必「同你死過」！事緣三奶奶的兒子蔣必正（吳卓羲飾）被騙，於是平日「聲都唔敢聲」的三奶奶都難忍怒氣，找主謀大奶奶（謝雪心飾）對質，賞她一巴掌後，大大聲警告她；大快人心之餘，還想跟她講多摑幾巴呀嘛！
有時除了追求小人物反擊的「爽」，令人淚流滿面的悲情戲同樣會令人釋放壓力。《城寨英雄》中的鑫鑫（林穎彤飾）命很苦，慘被親生父親賣給黑幫老大馮夏滿（李嘉飾）；不論主角們多次如何於危機之中拯救鑫鑫，她總是再次落入壞人手上，難以脫離魔爪。最終鑫鑫被強姦至死，跟她情同姊妹的刁蘭（胡定欣飾）隨即失控爆發，一口氣殺光現場所有流氓。雖然這段劇情甚為悲慘，但最終能為鑫鑫報仇也令人心頭為之一振。
圖片來源：互聯網
影片來源：互聯網、myTV SUPER、TVB
www.mytvsuper.com