泳兒（Vincy）今年首支作品「祝福」三部曲之一《同歸於盡》，延續暗黑音樂班底，更找來周耀輝填詞。Vincy跟創作團隊將今年的歌曲統稱為「祝福」，把人們一直覺得比較負面的詞，變成是祝福語，她笑說：「歡迎大家婚禮邀請我去唱呢隻歌，亦都希望『同歸於盡』可以成為一個全新嘅求婚字眼。」團隊今次專程飛到台灣取景拍攝MV，雖然整個MV Vincy全程「冇影」，不過她仍特意即日來回台灣探班，「記得嗰日拍攝完通頂節目，返屋企沖咗個涼冇落妝冇洗頭就去咗機場。同行嘅朋友miss咗班機，結果我係跑去機場閘口，差啲就上唔到機，然後再喺機場等我朋友搭下一班機。冇瞓過覺，仲要喺機場度奔跑，真係有亡命嘅感覺，跑完之後上飛機直程係想嘔。」
Vincy坦言最想親眼看到男主角向女主角求婚的鏡頭，不過到達現場後，卻給了她一個「大驚喜」，Vincy說：「冇諗到現場男主角係半裸出鏡，女主角好靚女，男主角身形亦都fit到爆，個胸大到迫爆咗個鏡頭，我仲比導演笑，佢話未見過我咁開心，話我自己陰陰咀喺度笑。」
雖然於台灣只逗留六小時便飛回香港，但Vincy認為這次探班非常值得，「知道拍攝團隊拍咗兩日好長嘅時間，我都想親身過去打吓氣。」她指這次「亡命之旅」正如她今年音樂主題，「用『生死』呢個課題去帶祝福俾大家。希望大家都可以珍惜每一分每一秒，想做嘅事情就盡力去實現，祝福自己同時祝福其他人。」