無綫台慶劇《法證先鋒V》昨晚（14日）開播，首個個案講述黃宗澤（Bosco）飾演的余星柏，為了偵破一宗珠寶情殺案，以身犯險體驗「氮醉」，並驚現「八爪魚幻覺」。該幕約1分鐘的場口，Bosco與工作人員在綠幕前卻忙了好幾個小時，Bosco要吊威也凌空做出踢腿動作之餘，又要被工作人員吊起「左揈右揈」，完全是肌力、耐力及腰力大考驗。
眼見被揈個不停的Bosco落地時滿面通紅，他坦言辛苦，還指工作人員同樣很辛苦。Bosco續指水底戲拍足一整天：「因為係幾場嘅潛水戲夾埋一齊拍。」並透露最辛苦是要「偷雞唞氣」：「我咬住個呼吸器雖然係真，但因為佢冇氧氣喺入面，加上個眼罩吸住咗個鼻，用鼻呼吸唔到，所以都幾辛苦。我成日都要打開少少個嘴角，喺唔穿崩情況下偷雞唞氣。」
之後首個單元個案隨即展開。劇情講述獨力照顧患病弟妹的任樂萍（連詩雅飾），家中失火並發現焦屍。正當眾人以為其行動不便的妹妹任樂盈（區明妙飾）遇害時，法證卻驚揭背後暗藏綁架事件。連詩雅是次以撲實Look上陣飾演前護士，獲讚具文青氣質，不過由於其飾演角色疑點重重，除了開直播令妹妹處境更為危險，亦被質疑有否利用家中藥物做手腳；連詩雅偶爾流露的不知所措及神經質情緒，令角色更添神秘感。
對於有不少網民留言直指她是首個個案Big Boss，連詩雅笑言：「個角色唔係大家諗到咁簡單，佢係深不可測，但內心其實對細佬妹有股好強烈嘅愛，大家睇埋落去就明。」連詩雅續指這股矛盾，亦是角色最好玩及最具挑戰性地方：「呢個角色做所有嘢都係有啲目的，所以就算演出平平無奇嘅情節，都要流露一啲伏線位，但又唔可以將佢啲黑暗面流露出嚟，加上佢喺短短兩集入面變化都好大，所以我要好熟讀劇本，咁先清楚理解到個角色每場嘅心理狀態。」