今個母親節，對C AllSrar成員陳健安(Oｎ仔)來講有不同的意義，因為媽媽在年初七跌傷手入院做手術，經過三個多月的時間，終於有一大進展，雖然離康復還有一段距離，但對於七十多歲的老人家來說，已是喜訊，不過在段日子，陳家上上下下都好擔心，而且過得一點也不簡單。
Oｎ仔在貼文寫咗一段心聲：
「呢三個月，唔簡單。
自從二月阿媽意外被撞到跌低手踭斷骨，全家都好擔心，好大壓力。手術後更撞上第五波疫情，我確診，屋企人確診，雪上加霜，延遲咗康復嘅過程。
起初連最基本嘅沖涼洗頭換衫用筷子食飯全部都做唔到，瞓覺會痛醒，七十幾年嚟第一次要用左手去做所有嘢，令左膊都有勞損，而最難過嘅一關係自尊心，因為原本覺得好簡單嘅日常都要靠人，好在我哋家人夠多，可以輪流氹輪流照顧。
我都第一次幫阿媽沖涼同洗頭，又要唔整濕受傷嘅手，又要預防跌低，技能解鎖。
經過幾個月嘅物理治療、職業治療、阿媽自己積極堅持日日訓練同按摩，中間曾經因為無進步而好擔心好灰心，到今日手踭屈曲嘅角度終於大過90度，手指終於可以掂到額頭，傷口都埋得好靚，見到你個份滿足感我就好開心，預計復康過程仲需要多五至六個月。
一個人出事，一家人分擔。
唔簡單，但總會過。
媽，勁！
多謝你帶我嚟呢度玩。
母親節快樂。」
Oｎ仔仲將媽媽手踭拆線及五月康復的傷口圖片附上，看見陳媽媽傷勢好轉，真的替她高興，陳媽媽，要繼續努力呀！
圖片來源:陳健安@ＩＧ