今日下午一點，林家謙又再化身林加場，發放最新海報，上面有句歌詞：「就算此時離了座 定有一個未來 能伴著過」，他公佈演唱會於8月27日星期六加開一場。演唱會總監馮貽柏表示，今次「安歌」加場， 大家星期一將會見到一個「充滿希望座位表」，九成門票全部公開發售，並祝福真正歌迷都可以撲到飛。
林家謙《SUMMER BLUES》演唱會昨晚來到第二場，他邀得偶像陳奕迅任嘉賓，Eason一出場，即炸裂紅館，歡呼聲掌聲大到蓋過唱歌聲，家謙都因為太興奮覺得自己唱唔夠完美，最終有福的是觀眾，《致明日的舞》合唱唱左兩次，最後阿臣突然又再送多首獨唱《今日》給家謙，家謙被感動到閃著淚光眼極紅，觀眾亦不少被打動，跟著家謙兩行淚眼。
九年沒有登上紅館舞台的Eason，昨晚一身粉紅色，配上圓形眼鏡出現，先出場跟家謙合唱《致明日的舞》，之後他笑問家謙，「我呢個look正唔正？陳家謙呀。我特登搵個眼鏡跟你㗎！」接著他又說，自己於台底等待時，聽到家謙唱到有點咽哽，「你差啲搞喊埋我呀。真係好感動。」由於觀眾歡呼聲未曾停過，Eason也忍不住跟觀眾說，「你哋好正！」又即迎來巨浪歡呼。
接著他跟家謙說，「其實係好多個月之前，你邀請我做你嘉賓，你一問我，我個心已經yes啦。林家謙係一個好值得大家錫嘅人，單係佢音樂已經散播緊一種治癒。我第一次聽你係「下一位前度」，由其塞車嗰陣聽，真係可以降燥。」由於家謙一直冇咩出聲，所以Eason又笑話，「我知你係怕羞草….」家謙:「唔係呀….我唔覺得係…..」Eason:「我知呀，你個心底裡面都賤賤地….」全場大笑歡呼，「我哋大家都係St.Jo仔，係咁上下，少少百厭囉…哈哈哈….」
家謙說自己剛剛因為太緊張，所以唱得麻麻，沒料到Eason即鼓勵他 ，「你想點呀？live 嘛！係咁㗎喎！你已經做得好好啦！第一次做喎！六場喎阿哥！我第一次都係四場咋！會愈來愈好，唔駛擔心！」觀眾立時歡呼聲又再四起，Eason玩得開心更停不了:「唔啱再唱多次囉！」重鬼馬扮fast foward 倒轉行番原位，紅館再次發出核爆歡呼聲，掌聲，兩人又再重唱多一次《致明日的舞》，開心到觀眾飛起。唱完之後，Eason叫家謙坐下，話有禮物送給他，家謙非常驚訝，擘大口得個窿不懂反應，乖乖坐在台上，Eason:「佢真係唔知o架！以下呢首歌！我送俾你，送埋比現場大家！」家謙感動得紅眼通紅，變回一個小粉絲，坐於紅館台上聽偶像唱歌。
昨晚家謙還有林欣彤及C All Star 任嘉賓，林欣彤話，「林家謙我係台下面聽《下一位前度》聽到喊呀！你今日行到上紅館，咁多人愛你，大家覺得林家謙值唔值得呀？」全場大叫：「值得！」她直言很感謝家謙為自己寫了《林中鳥》一曲，每次獻唱都感到自己變得越來越巨大，然後問家謙：「你可唔可以同我一齊變大呀今次？」家謙笑問：「邊度？變大？」接著兩人蹲下來扮升降台旋轉上升，起歌！C AllStar跟林家謙合唱《留下來的人》、《沒明日的恐懼〉，C AllStar說： 「唔知點解覺得林家謙係好需要保護，上到台就好自然想拖住佢。」此外謝安琪、徐豪縈、方皓文、岑寧兒、小塵埃，蘇麗珊等均有捧場。