林二汶下周三（28日）將舉行《林二汶x安達人壽45周年網上慈善音樂會》，所籌得善款分別捐予兩間慈善機構：推動創效社會項目機構《香港社會創投基金（SVHK）》，以及專門拯救被遺棄動物機構《大樹下善待動物庇護站（大樹下）》。
二汶一直以來都有關注不同的動物慈善機構，今次向《大樹下》捐款的原因是創辦人對動物不離不棄之心，她表示：「不論發生乜嘢事、經營有幾困難，創辦人都一直堅持，絕對唔會放棄狗場貓場嘅小動物，佢同義工們對動物嘅愛令我深受感動。」社會上不少動物慈善團體都面對營運資金問題，二汶認為想改善以上問題，最應該由教育開始，她說：「我哋所有人都要保護動物，呢一個係社會責任，當你帶小動物返屋企第一日就要確保佢唔好餓親、身體健康同有一個舒服嘅生活環境，唔好有事就遺棄佢哋。由我同家人領養四四返去至今，我哋都做到以上幾點，爸爸媽媽有時錫佢仲多過錫我。如果人人都做到，就唔會有被遺棄貓狗，亦都唔需要有咁多呢類機構同咁多人手。」
對於近日因移民潮又多了動物被遺棄個案，二汶呼籲大家要好好妥善處理，千萬不要做一個不負責任的主人，「主人就係寵物嘅全部，幸好我身邊朋友都安排得好好，如果人人都負責任就唔會有遺棄潮，狗場貓場就唔會有咁大負擔。」而另一受惠機構，則是由安達人壽捐款予《香港社會創投基金（SVHK）》，希望藉此為香港推動社會創新，為未來作好準備。二汶在音樂會內唱出《最後的信仰》一曲希望鼓勵大家「想保無邪之驅，還是必須好好過下去」。她續說：「世界點轉變都好，大家都要好好生活，人生入面好多事可以令自己變得更好。」二汶希望大家常保持好奇之心、多學習，生活定必愈來愈好。