李幸倪（Gin Lee）今日（12日）推出第二首派台歌《單戀這件小事》，新歌有別於她以往曲風，是首甜甜的R&B情歌。向來愛錫fans的Gin解構歌曲由來：「因為好多fans都好想聽我唱多啲R&B歌，同埋以往唱嘅絕大部份都係慘情歌，所以今次特別揀呢個style。」R&B當中，Gin刻意挑選於自己求學時間、影響她很多的歌手，她說：「其實呢首歌好Babyface，嗰個年代仲有Destiny’s Child、Toni Braxton等等，讀書時好鍾意聽佢哋嘅歌，依家睇返嗰個年代聽呢啲歌，嗰個回憶係好美好。」
說到「單戀」，Gin亦分享了自己的單戀小故事，讀書時期喜歡上一個靚仔又有才華的學長，自以為毫不浪漫的Gin因為學長而親手製作小禮物，每次見到對方喜歡的東西，都會買下並不署名地偷偷寄給他，期望有日對方會猜到自己是送禮人：「通常鍾意人嘅時候，我嗰個狀態會囉囉攣、每一日都甜絲絲，好似所有嘢都會變得好美好。每一日都會好想同佢message、講電話，我真係好識講電話，可以講十幾個鐘，哈哈，煲電話粥係我嘅強項！」
Gin坦言錄音時有多方面事情要兼顧，包括語氣及表情，唱得稍為激昂，便會導致反效果：「要笑住唱，有啲段落比較夢幻，演繹上就要營造嗰個氣氛，要keep住甜，就算去到高音、要唱得激昂，都要keep住甜個感覺係比較困難，因為一用力去唱就好容易變得惡，所以要由頭到尾都keep住夢幻、甜同愛，呢個演繹係今次嘅目標。今次真係好想大家聽完之後，會甜絲絲、好開心、好有愛。」
除此之外，Gin繼前晚（10日）開IG live速遞外賣俾fans後，昨晚（11日）她又玩直播跟網民互動，她表示昨晚直播後收到很多訊息問她為何只得兩個名額受惠，為了可以有更多人一齊參與，有網民提議組團睇戲，Gin一口答應，豪氣請fans到戲院觀賞電影《死屍死時四十四》， 她對網民說：「你哋唔好跣我，去到得我自己一條友喺度睇，唔好放我飛機呀，哈哈。」到達戲院取得戲飛後，Gin便不停派飛及合照，笑言：「呢排好多嘢撈，又要派飛又要送外賣。」