李幸倪（Gin Lee）日前生日，雖然要在工作中度過，不過一班fans已約好跟她於電車上開生日party。 歌迷會分別以一部冷氣派對電車、一部車身印有其靚樣及愛貓肖像的電車舉行生日派對。兩部電車由石塘咀電車總站開出至銅鑼灣，再駛回石塘咀，沿路fans一邊站在上層露台、一邊播放着Gin的歌曲。當電車駛至中環時，Gin便現身電車站上車，一眾fans隨即起哄歡呼。
Gin上到電車後，難得與fans近距離接觸，她逐一跟他們傾偈兼影相，當中原來有數位於外國讀書的fans特意回來參加生日會，其中一位修讀音樂的男fans，藉機問Gin音樂上的問題，更「表白」希望將來於Gin的演唱會上為她伴奏，氹得Gin十分開心。隨後，大家邊唱生日歌、邊拿出準備已久的神秘生日蛋糕，當Gin一見到是自己喜愛的牛角包蛋糕時，十分興奮並大叫：「我以為我呢生人要去到Paris先可以見到咁巨形嘅牛角包！嘩！好勁呀呢個！」
提到生日願望，Gin直言第一個願望是給在場的fans，「祝每一個喺現場嘅你，身體健康，日日開開心心，所有嘅願望都會成真。」Gin表示十分感謝公司及歌迷安排這個慶祝活動，「架電車有冷氣真係好舒服，特別係夏天。之前間唔中都見到呢啲party電車駛過，都好想開個電車party，今次終於輪到我啦，哈哈。同埋因為車廂有人數限制，所以未必每一位fans都出席到，睇吓下次可以點樣部署令到多啲fans可以一齊gathering，希望下次可以四架、五架，然後我就輪住上去同佢哋傾偈。」