李克勤一連9場「李克勤慶祝成立三十週年演唱會」昨晚在紅館開騷，而好朋友兼舊拍檔鄭秀文更任表演嘉賓帶來無盡驚喜。克勤昨晚在12名男舞蹈員伴舞下、以一曲《舊歡如夢》登場，不停變動的大形舞台，讓觀眾目不下及，克勤不單上大唱大跳，更要吊威也衝向兩旁斜高台作45度離地動作，最後還化身空中飛人、飛上半空連環360度轉十個圈，看著他這一連串高難度動作，觀眾都嘩聲四起，掌聲雷動。
當晚克勤繼以結他自彈自唱，飛人之外，又一度站上20呎高、僅容立一人站立的圓柱高台上獻唱，盡顯藝高人膽大；圈中一向人緣甚廣的他 ，得到謝霆鋒、蔡卓妍、鍾欣潼、校長譚詠麟校長、劉德華、郭富城、梁詠琪、李家鼎、著名羽毛球手伍家朗、周慧敏等拍片道賀，校長更笑指克勤是「過份嚴重尊重老婆協會」會長！而Sammi除了拍片打氣，更親身支持為克勤擔任表演嘉賓。
戴上藍色假髮的Sammi以全藍造型登場，與克勤擁抱後，Sammi就笑指換上一身紅色打扮的克勤尤如一個利是封，又打趣的投訴克勤說：「你搵人做嘉賓真係好Q麻煩，連dress code都要管埋，對嘉賓著乜嘢衫都有特別要求，由頭到尾都只能著一種色，我原本想著黃色，又唔想升上來成條蕉，著綠色又成棵菜，原本我有套紅色衫都好靚，但無理由同你好似兩個利是封咁，又唔係過年騷，㨂左幾十套衫後，最後決定粉藍色就變成依家支波子汔水咁，我連底環都係粉藍色，哈哈。」克勤就笑指要問一問許志安了。大會播出了克勤和Sammi當年合作的《浪族闊少爺》劇照，當中不乏二人的親吻照，克勤記唔記得係幾耐之前合作？Sammi稱這部是自己第一部電視劇，應該無30年又再搞笑的投訴克勤謂：「好尷尬，你嘅演唱會講到明30年，同得你做friend好容易出賣年齡，其實你幾多歲呢？」
克勤即說：「你嚮條片都講左五張嘛，不過仲爭少少，而且男人到五張先有啲男人味，同你嗰個差唔多，又係咁鍾意踢波。」Sammi也稱跟克勤的太太也是差不多，而且最近跟盧淑儀在社交平台聯絡較多，相對克勤更加熟，克勤又說：「有件事好好笑，我太太很少有機會睇到你嘅演唱會，因為每次她都大肚，所以你再開演唱會、我就要準備下先。」Sammi就笑窒克勤：「得唔得呀你！操下體格先喇，五張嘢喎，仲咁瘦！」二人合唱《信者得愛》後，又再狂跳的勤笑言為二Sammi扭動蛇腰；Sammi則憶述之前在紅館開騷遇正失聲，克勤第一時間短訊問要不要幫忙，要就開聲；而今次克勤沒有綵排直接開騷、知道克勤好擔心也私下短訊慰問，在娛樂圈最珍貴的，就是大家互相支持幫助的精神，二人又再來一次擁抱。繼而Sammi獨唱《終身美麗》，讓克勤有時間返入後台換衫。
演唱會期間，克勤提到做過過百場演唱會，首次搭台比預計遲了一日、到當日中午才搭建完成，因而影嚮未能做總綵排，如果有未盡善之處，希望大家多多包涵；又不忘感激老闆楊生，令他有個轉會機會，給予了他一間安全屋，讓他住得好舒服和安全。
完騷受訪，他稱完成首場的感覺是呼一口氣、大步檻過，因前一晚凌晨5時返到酒店仍擔心得睡不到，更稱可能睡得少，中段有少許聲沙，慶幸頭尾部份都ok；並謂：「特別是第一part，又要跳舞又要吊威也，不過第一次被吊到咁高、感覺又幾爽；只是太太看到我凌空360度轉圈，有黑面問是否真的要做，叮囑我要小心。（一度急降落台及彈起上台都好博命。）之前只試了3次，而正式表演是第1次跳得咁高。其車我在台上還一度抽筋，可能企得太耐、加上開騷前博晒命排練，加上今次的舞台機關特別多，而這方面就要感謝公司愛錫自己，因全部都係錢。」克勤又指要多謝Sammi做嘉賓，被取笑他大膽的在太太面前攬Sammi，還播出與Sammi的咀嘴劇照，克勤笑謂：「我真係唔知，不過頭先太太嚮後台有攬一攬我、還講good show，即係無事喇，哈哈。（兩個兒子有無捧場？）領晚無，或者星期五、六、日，不用返學才來看。 」克勤於安歌時以粉紅晨褸亮相，笑問可會考慮脫下內裏的睡衣真空上陣？克勤笑指不會了，因得知不用騷肌，無練一個星期健身，胸都細了、變回32A！
