李克勤將於5月在紅館舉行「弦續李克勤‧港樂演唱會」，今次是克勤相隔6年再踏紅館開個唱，也是20年後再跟香港管弦樂團合作。克勤說：「影海報當然心情係極度興奮，好大陣仗呀今次，人多勢眾，覺得好熱鬧，好開心，回想返對上一次合作，已經係20年前。當年我只係7、8歲啦，嗰種感覺係你識個朋友二十年，再一次合作，大家無論係感情、功力上都有昇華。今次張海報主要係想表達呢個騷，主要係要話俾大家知，音樂可以有好嚴肅一面，亦可以好輕鬆快樂，個騷好認真做亦可以好好玩。」
克勤表示是次挑選西裝拍照，都是由老婆負責揀衫，「我拆開個衫袋，以為自己帶少咗襯衫，點知打俾老婆，佢話：『你識咩，總之入面真空啦，乜都唔使著，係咁先靚。』老婆話乜就乜啦，覺得入面涼浸浸咁。影個陣有工作人員竟然提我，李生你走光呀！麻甩佬都有人提走光，我覺得好好笑。」
克勤又指疫情之後，相信每一個對音樂有憧憬的歌手，都好希望在紅館做騷，「今次個騷，我希望歌迷觀眾可以多些參與，所以已經係社交媒體上面，叫歌迷留言俾我，想聽咩歌，大家同我一齊揀，我哋已經開始籌備緊好多新元素喺個騷入面，呢輪日日開會，為個騷拍攝影片咁，都好忙下，自己操練就都係咁上下，我不嬲都大量運動，唔係打波就踢波，所以都唔使點狂操。」
問到演唱會會否有特別嘉賓，克勤就笑道：「有，其中一晚仲會有一個來頭好猛嘉賓添，就睇下大家買飛買唔買得中啦！」
