李克勤與澳門管弦樂團昨晚（29日）在澳門倫敦人舉行一連四場《我們的交響樂演唱會》，跟樂迷共度中秋。今次除了太太盧淑儀及兩個兒子，外父外母都齊來支持，一起於澳門度過一個熱鬧的中秋。
昨晚的頭場演出，克勤以《月半小夜曲》跟大家一同於舞台上賞月，聽得觀眾如痴如醉，演唱會過後有歌迷寫下觀後感，「他的歌大多有藝術性，普通人唱不來，絕對是天花板級别的佳作！」亦有歌迷覺得時間太短， 意猶未盡，準備再多看一場，這些評價都讓克勤十分開心，他表示：「我啲歌好多都好夾管樂，管樂昇華加持再重新編曲之下，大家可能因為咁感覺到藝術性。觀眾覺得時間太短就真係好啦，其實一啲都唔短，係個騷好睇大家先會覺得唔夠喉。」
克勤又跟觀眾互動大合唱《紅日》，表示入行幾十年很多歌都是廣東歌，不過有幾首歌真的讓不會廣東話的人，為了可以唱到而去學廣東話，《紅日》就係其中一個好例子，「無論去到世界各地咩地方，無論佢哋係講緊英文、國語、潮洲話、上海話，都識唱《紅日》，呢件事真係幾榮幸。唔單止帶動到廣東歌、廣東話，亦都帶到正能量俾大家。」
克勤在澳門過中秋，以為未必有月餅食，豈知才剛到埗，歌迷、朋友，還有特別嘉賓梁玉瑩（表妹）都送上月餅，「成個後台有幾十盒，真係好誇張。咁做騷我唔敢食咁甜嘢，但都有食少少一啖仔應下節。其他留俾工作人員同屋企人食囉。」
今次澳門演唱會，克勤不單換上全新Rundown及全新制作，跟香港演唱會不一樣，連舞台服裝都全新，不少歌迷大讚他衣著配撘得宜，於網上留言: 「白色裙子跳護花使者，很有感覺～黑色披風跳秒針，帥到起飛修身西装唱大会堂，真是太會配了。」昨晚克勤跟觀眾打招呼，講中秋節快樂，就已經有觀眾即時大叫，「好靚仔呀！」他笑道：「咁假的說話你都講嘅？哈哈。對於着衫，坦白講我真係唔識，全是太太功勞。我平日出門最多就係波衫波褲，因為不用工作出門我就係打波，哈哈。」
克勤對於是次演唱會最難忘是酒店的貼心服務，為他作了最細心的安排，他認為必須公開向酒店致謝，「過澳門之前，酒店有問我服務上有什麼需要，盡力安排。我話其實我想要一張好硬好硬嘅牀，因為之前自己已經忙，一返香港又貪玩，明明個人都攰，仲要去打波，就又傷番條腰，搞到之前試過行路都要拐仗撐少少力，嚟澳門之前我都已經日日針灸做物理治療，治療師叫我要瞓最硬嘅牀，咁先可以快好啲同埋唔容易再閃親，我之前喺屋企直頭係瞓地下。酒店點可能有地下咁硬嘅牀？所以我都係咁易講下，唔抱希望啦，點知佢哋係我張牀嘅牀褥下面，直頭放左塊木板，係我咁多年走遍大江南北第一次得到服務，見到塊板嗰一刻，直頭真係感動到眼濕濕啦，邊有咁好㗎，真係要公開多謝佢哋呀！綵排完我成身散晒返到房，撻落牀嗰一刻我十足條死魚撻落砧板上一樣，個心除咗感恩都係感恩。演出得咁好，酒店務服真係功勞好大。」
