楊千嬅將亮相本周日（28日）晚播出，由王祖藍主持的節目《有個閨密叫祖藍》，暢談與老公、囝囝、奶奶的關係。千嬅大爆老公是「運動魔人」，即使只是上綜藝節目也當正「真．比賽」：「有次佢特登train咗三個月先去拍，我提咗佢十次呢個係節目、你只係演員，佢就話自己係運動員。」
千嬅說到此處即笑指自己沒嫁錯人：「整整吓佢搞到我都覺得自己係運動員，跟住就唔肯認輸喇，但有次我出咗意外，鬥牛成個飛起咗，就輪到丁生話番我只係演員。」談到祖藍讚丁子高身形Fit，千嬅又指老公身形沒祖藍想像般Fit：「佢遮得好咋，話佢Perfect figure又唔係。（你都冇咁嘅需要啦）我又冇要求佢，但最好唔好咁走樣啦。」
愈講愈興奮的千嬅，笑指丁子高經常「唔識撈」，令她哭笑不得：「好似一齊做音樂節目，佢會走嚟話你個音要拉番長少少，跟住我就feel到自己個丹田有火」、「第一日約人飲嘢，通常唔會將人哋所有缺點講晒出嚟呀嘛，但佢就話：『你啲衣著配搭有少少問題，如果我喺客嘅角度會有啲考慮。』」
千嬅強調與老公並非一見鍾情，只是愈相處愈發覺自己深受對方影響，並謂現時在上海居住也是因為老公的上海人身份：「當初嚟係因為佢好耐冇見屋企人，佢屋企大家族嚟，每次食飯都成三圍枱。但我爸爸媽媽喺香港，所以都會掛住香港。」千嬅又分享與奶奶打牌趣事：「打牌我識識哋，但又唔係好識，因為數學真係相當差。初初打我好驚㗎，奶奶好認真，唔可以亂打。譬如人哋做大牌，但我又唔知亂咁打，結果打出去俾個雞糊截咗人哋一舖150幾番，真係驚過輸㗎。」
