方力申與胡定欣在周一剛開播的劇集《廉政狙擊》飾演繼母子關係，小方今日（24日）在社交網貼上二人少年時與現在的合照，留言：「大家最近有冇睇《廉政狙擊》入面，我呢個衰仔邦少同我同年出世嘅繼母不停鬥嘴鬧交呢？其實我同定欣早在16/17歲就已經認識，而我第一次入電視城做觀眾就係支持定欣參加《全球華人新秀歌唱大賽》，估唔到隔咗咁耐我哋先有機會合作做戲，佢仲要做我阿媽，真係有冇攪錯（佢講but我心裏暗喜）。記得我哋拍嘅第一場戲，我嘅第一句同佢講嘅對白係：『八婆！』老友呀老友，我永遠都會記得我哋第一次合作有幾咁愉快。#大家都冇整過容 #仲認到 #itsawonderfonglife #廉政狙擊」。
定欣回應小方留言：「真係有無搞錯，16/17嘅時候嘅我哋，點會估到20幾年後我哋會合作拍劇，我仲做你後母。今天嘅小方已經同以前好唔同，你真係有好大嘅改變！唔知下一次嘅合作又會係點呢？最緊要係友誼永固」；小方則反駁：「我冇咩改變，我仲係游緊水，比緊賽；改變係妳，已經唔係好似以前咁入場撐我喇」。
