作為今年新人的MIRROR成員李駿傑（Jeremy），最新派台歌《九》延續《半》的概念，新歌MV中Jeremy陷入亦正亦邪的深層演繹，出現黑、白兩個造型，分別代表善與惡。放低乖乖仔個性的他將妖艷升級。
今次新歌得到王雙駿（Carl）監製、張繼聰（Louis）作曲，Jeremy說：「請到張繼聰前輩作曲係因為Carl叔叔，可能Carl叔叔覺得Louis作嘅歌比較適合我，所以收到Demo時都好驚喜，因為冇諗過會有佢寫歌俾我，有啲Surprise。」Jeremy坦言這次演繹有難度，更在錄音時唱到聲沙，他說：「難在要唱出味道，Carl叔叔一路斟嚼用氣唔夠，跟住錄咗兩個半鐘後，把聲完全沙晒唱唔到，可能因為我捉唔到個力，搵唔到個Feel夾硬唱，結果搞成咁。」
今次製作團隊為他找來一個荒廢了的酒醋廠，猶如廢墟的場景，再加上Jeremy跳出乖仔框框，令MV帶出不一樣的妖艷效果。Jeremy分享道：「第一次喺外景，好熱冇冷氣，另外好多塵，冇咁乾淨，喉嚨成日有啲唔舒服，但係因為外景原因，令到畫面更加加分，所以幾辛苦都係值得，因為可以拍到靚Shot，配合成個環境，MV會更加吸引，所以不論幾熱幾辛苦都係值得嘅，不過都辛苦晒幕後嘅同事。」