昨日（3日），近來人氣急升嘅娟姐練美娟接受網上平台《盒子BOX channel》訪問，為節目《月傾會》擔任最新一集嘉賓。星級主持人林柏希（William）問娟姐，由2017年喺ViuTV出道，短短幾年間憑《大叔的愛》正式入屋，到最近拍廣告、做MC又有新節目未停過，依家係咪有當紅嘅感覺？娟姐就話：「我唔知道點樣為之紅，但係我多人認識咗係真嘅！入咗行都幾年啦，之前都有主持一啲節目，當時喺條街度行，係冇人realize到你！」娟姐坦言唔係走玉女路線，反而自嘲係個「肉肉女」！
現年31歲娟姐單身咗4年，問佢揀男友有咩要求？娟姐話自己只愛大叔，「我諗我偏向成熟啲，小鮮肉嗰啲我係一般！」強尼啱你喎？「強尼嗰一類，我鍾意啲安穩感覺、大叔啲，我係鍾意大叔㗎，我鍾意成熟系！」對上一個男友，更加大過娟姐十幾年，真係大叔的愛！林柏希單刀直入問娟姐幾多歲失身，娟姐答得爽快，「失身呀？18歲，合法嘅！死啦，我經理人抹緊汗呀，哈哈哈！」仲爆自己小學五年級已初嘗初戀！
娟姐之前喺ViuTV節目晚吹系列《有酒今晚吹》，自爆曾經親眼見過一個女星姣錫TVB人夫嘅場面。林柏希就叫娟姐重演事件經過兼要開名講出邊個藝人，娟姐立即面有難色，佢話真係唔開得名，惟有還原目擊經過，娟姐即刻姣精上身，示範當晚飯局入面姣錫TVB人夫嘅場面！唔敢開名，當然要飲加料飲品懲罰，娟姐真係成杯灌晒落肚！
輪到問佢拍《大叔的愛》時候嘅秘聞，劇中有MIRROR三子，究竟Edan、Anson Lo同Stanley三個，邊個最孤寒、最小氣同最多女冧？娟姐秒答教主Anson Lo最多女冧，「最多女冧一定係Anson Lo莫屬，無論青春少艾或者已婚人妻，你知唔知連我表姨媽都好鍾意佢！」最小氣，原來係Stanley，「我可以講嘅係Stanley，可能我同佢熟呀，佢成日都會對我小氣囉！譬如有時預咗好多嘢，佢會話『又冇預我，娟姐』，跟住我心諗，男人老狗唔好同我計呢啲啦，我好相信係因為佢同我熟，所以佢會咁樣同我玩！」至於最孤寒，娟姐就話真係諗唔到，反而主動爆料話邊個最鹹濕就有喎！
娟姐話：「我覺得Edan最鹹濕！因為佢血氣方剛，我成日見到佢平日休息嘅日子，都係睇女仔嘅IG！我成日話，又𥄫女呀，佢話，睇下女仔啫，你知佢嗰啲死人乞人憎樣。我唔敢講咁樣係鹹濕，但係佢對異性最有興趣啦！唔係鹹濕，但係成日𥄫女囉！」最後問娟姐如果開拍一個配對節目，黃德斌、許紹雄同鄧健泓三個圈中男星，佢會揀邊個？娟姐就話：「我一定係黃德斌！我拍劇又識佢啦，佢係一個內斂嘅人！」如果古天樂VS黃德斌又點揀？娟姐都係揀德斌喎！
