Dear Jane將於十一月在西九文化區的Wonderland竹翠公園舉行大型戶外騷，唱慣紅館的四子對今次非常興奮，更會把Dear Jane早期的Punk Rock音樂，再次帶給樂迷。
○三年成立的Dear Jane，明年便是第二十年，由地下樂隊到主流音樂，由六百人的場地一步一步走到大舞台，但Dear Jane卻未想太快到達這個里程碑。
Dear Jane早期的歌曲以Punk為主，到後期才開始加入Pop Music元素，曾經有網民質疑他們是否因迎合市場而減少創作這類曲風，Jackal解釋：「其實我們做了很多Punk Rock歌，只是比較冇咁受歡迎，大家才覺得好似沒有推出過。」
今次戶外騷，Dear Jane表明以Rock行先，Tim說：「rundown上很不同，今次會揀Rock歌、嘈到爆的歌，其實好多時都沒有機會演出這些歌曲，戶外可以大玩特玩。」開會籌備歌單，四子都揀了Dear Jane最早期的作品，今次點都要唱！「我們的第一首歌《男兒當打交》、《放大假》、《戰狼三國》、《空中小姐》等等，這些都在list裏面。」Howie補充：「我們希望分開兩part，又有動又有靜，歌迷又開心。」Nice說：「其實戶外騷都可以有浪漫sweet的感覺，在戶外大合唱情歌感覺又不同，大家可以放心。」
今次演唱會的主題是「What’s Happening」，Tim解釋：「有少少問候大家，How are you？大家生活過成點呀？這兩年大家見面的時間少了，是互相關心的一句說話。」在香港以前沒有太多戶外場地，現在多了很多地方給歌手演出，「戶外騷可以很純粹，室內場館很多時都要plan定好每一part，夾個台點走位，戶外騷簡簡單單只是玩音樂，所以真係幾期待。」外國樂隊開戶外騷有很多互動環節，Tim表示：「仲諗緊，我哋想拋波，睇下有冇得射吓水，當然要睇情況啦，最好大家可以一齊濕身，觀眾濕水、我哋就濕汗。」Jackal則想玩觀眾插水，「我見過戶外騷表演者插水式咁跳落去，如果可以，我真係想試，但受疫情影響，都要謹守防疫規則，保持適當社交距離，哈哈！插水我估要等疫情過了，仍然同監製和公司研究當中。」
談到Dear Jane在○三年成立，不經不覺明年便二十周年，Tim馬上嚇到彈起，他說：「冇計到添！不如計我哋第一首派台歌啦！○五年啦！唔好咁快二十周年，唔係驚，而係覺得這是一個里程碑。」Howie說：「係喎！到時可以用里程碑做個主題開騷，但在這個里程碑之前，Dear Jane想做多幾樣嘢先。」在香港夾band堅持二十年並不容易，問Dear Jane有什麼「長壽」秘訣？Howie一臉正經地說：「不要為了做明星歌星而做音樂，首先要自己鍾意，鍾意就會不停做，是passion，其實香港現在玩音樂，有簽唱片公司又好、冇唱片公司自己在網上發表又好，其實都是為夢想而做，要記得自己為了什麼而做，咁就可以玩一世。」
回憶起一一年，Dear Jane第一個售票的演唱會，當時只是容納六百人的室內籃球場，不過那次銷情相當慘淡，「好記得開售一個星期，公司話賣得七張飛。馬上call晒親朋戚友，最後有三百人，將個場地cut一半去搞。」當時的經歷令他們留下陰影，Nice說：「所以每次賣飛騷都好驚，第一樣就諗啲飛點算？」
由十年前只售出七張飛，到現時五場紅館極速爆滿，Tim直言意想不到：「初時夾Band點會估到會有人搶飛睇？」他們感激很多的幕後功臣、唱片公司同事等等，成就了今日的Dear Jane。問Dear Jane幾時再開紅館？Tim笑說：「二十周年囉！咁就唔介意早啲到二十周年，明年都可以搞，哈哈！」
髮型：Jamie Lee @Hair
化妝：German Cheung
