吳尊出名愛錫仔女， 不時會帶一對寶貝欣怡（NeiNei）和欣樂（Max）到外地遊樂。 不過，吳尊噚日（8日）於微博發文表示，8歲嘅NeiNei因輸咗芭蕾舞比賽而傷心痛哭，見到囡囡咁失落佢亦忍唔住落淚。
吳尊透露囡囡從3歲起就開始學芭蕾舞，近日為贏得「亞洲國際芭蕾舞大賽」下咗唔少苦功，日以繼夜地練習舞步。但佢係年紀最細、又係第一個出場，發揮未如其他參賽者，NeiNei得知落敗後當場哭成淚人。
吳尊寫道：「第一次的個人演出，她一直告訴我真的很想贏，但我知道汶萊芭蕾舞的環境還是不能跟海外比⋯⋯其實我只想讓她來見識、來吸收經驗，讓她去感受失敗的感覺也不是壞事。我會慢慢讓她明白過程比結果更加重要。她今天的表現是她有史以來最好的一次，在我心目中，NeiNei已經很值得爸爸驕傲了。」
網民都心疼留言，「哭得這麼傷心，看了都好難受啊」、「每一個成功背後都有無數次的失敗做積累一起加油」，吳尊就回應「我也很難受，看她哭了還拍她，但這照片對她以後的回憶太珍貴了」，佢又話NeiNei嘅心情已平復「結束後帶她游泳，她現在開心地吃晚飯了，堅強的NeiNei。」
圖片來源：吳尊@微博