思家大戰｜羅家英發表愛姐宣言 汪明荃打冷震嗌毛管戙

家英哥高呼I love you，
搞到阿姐都話毛管戙。

本周日（13日）播出的一集《思家大戰》，有「夫妻檔」汪明荃及羅家英攜手率領的「荃家高瑩俊」隊，成員包括粵劇拍檔謝曉瑩、郭俊亨及負責音樂的高潤鴻師傅；對戰林夏薇率領的「寵愛Pet Pet」隊，成員有姜大衛（John哥）、周嘉洛、徐榮及古佩玲。

「寵愛Pet Pet」隊嘅焦點就喺John哥度。

今集「荃家」絕對是焦點所在，家英哥無時無刻吼準機會發表「愛姐宣言」，當思捷問到他對粵劇與電影的看法時，家英哥即賣口乖謂：「我拍電影就家肥屋潤，娶到老婆啦！」引發全場尖叫；之後問到夫妻愛情保鮮法，家英哥即九秒九捉緊阿姐玉手：「因為我哋經常拖手仔行街」，更忽然向阿姐高呼：「I love you！」嚇至阿姐打冷震謂：「嘩！毛管戙！」雖然阿姐把口咁講，但其實頻頻忍不住冧笑、相當嬌俏。

家英哥突然殺阿姐一個措手不及拖手仔。

全程情緒高漲的家英哥亦有甩碌，事緣思捷追問家英結婚多久，家英還未開口阿姐已瞪大雙眼望到實，嚇至家英哥即時口窒：「我係0…09年結婚嘅，14年喇。」當回答「問咗100位已婚男士，硬係覺得人哋老婆有咩好過自己老婆」時，家英哥竟衝口而出答「慳家」！令阿姐即時成為被狙擊對象，思捷更起勢拿阿姐身上衣服作話題，阿姐即精靈拋出一句成功扯開話題：「最緊要睇吓（答案）啱唔啱先。」

+2

阿姐表情包好可愛。

John哥的幽默度亦不輸「荃家」，當思捷問John哥與成班後生仔合作拍劇有何挑戰？John哥一本正經說：「咩挑戰啫？學嘢咋嘛。大把嘢學啦，佢哋講嘢行路都唔同㗎。」更隨即做出「縮頭縮腦」動作兼指着周嘉洛，又大爆嘉洛無時停。在回答「人哋老婆有咩好過自己老婆」時，John哥毫不畏懼飛出「脾氣」二字，大爆太太李琳琳脾氣不好！

John哥咁樣話老婆，真係視死如歸。