楊千嬅今晚（17/12）於亞洲國際博覽館Arena舉行《MIRIAM YEUNG B minor MUSIC LIVE 2022》演唱會，演唱中段跟觀眾訴說這幾年間的感受，亦感謝歌迷長道而來支持，縱然只得兩晚各兩個小時，很短時間的演唱，卻對她而言是永恆。千嬅又問歌迷是否很好奇，在這個時勢出來開演唱會，她說：「我係為咗一直以嚟愛我、支持我、好擔心我、好耐無見、曾經俾過機會我、栽培我的前輩、我屋企人、我爸爸媽媽、對我有期望的人，我一定會返嚟再開演唱會，同大家講，我好掛住你哋，我過得好好。」
在潮州家庭成長的千嬅自言從小就很倔強，即使遇到不開心、痛苦的事情，即使摔到頭破血流也不會哭，「因為俾人知道我痛，我會覺得自己好廢，但大個咗之後，唱歌又好似失控咁，其實我喊係因為有時見到人哋求婚好感動；人哋失戀好傷心同我傾訴時，我覺得好傷心就會喊；有時見到一啲好感動的畫面，我會替人哋感動而崩潰咁喊，我嘅眼淚係每一個你哋同我分享故事時攝埋攝埋。」
在這幾年間，千嬅回歸家庭，亦學懂一件事，「我發現我原來係一個女人嚟嘅，我覺得我最大嘅人生進步係我承認自己會痛，我係會傷心，我會講，要承認自己嘅感受，我覺得呢樣嘢好重要，所以我要多謝我個仔，係佢點醒咗我，我以為我四十幾歲人要教十歲嘅人，點知俾十歲嘅人教返轉頭。」千嬅憶述有一次被囝囝問：「媽咪，你做乜唔開心？噚晚見到你喺房入面喊，今朝對眼腫咗。」她初時沒有承認，但之後發現圓不了謊，亦因而反思，「點解我要話無嘢呢？我係可以喊，可以為自己喊，亦可以為開心而喊，我多謝你哋share咗我嘅眼淚，我今日嘅喊係為咗自己喊，係因為開心到喊，好多謝你哋每一位。好順風順水時開騷好high，講好多好多嘢，大家嘅掌聲係鼓勵，亦令到我好驕傲，但我最大阻力、最困難時，得到你哋嘅掌聲係我人生嘅高峰，好緊要，真的好緊要。」
千嬅坦言這個演唱會沒有贊助、廣告、三千萬的堆頭，卻有她的所有音樂「贊助」，「多謝所有為我作曲填詞的朋友，因為他們的作品加持了我的人生，加持了我的音樂路。」