張敬軒紅館演唱會昨晚（27/12）來到第四場，分別請來Tyson Yoshi及泳兒擔任嘉賓。軒仔透露與Tyson的相遇很奇怪，還被他激嬲，「佢竟然同我講，細細個就聽你個首《孤單公園》㗎啦 ！」軒仔之後「質問」Tyson，「你話細細個鐘意我，究竟幾細？你咪亂講野呀？」Tyson答得小心翼翼，「中‥‥中‥‥中學，小學嗰陣你未入行‥‥‥」答案終於令軒仔滿意，表示：「嗯！你小學我未入行，講得好有前途！」Tyson最喜愛軒仔的《孤單公園》，讚道：「我以前諗，如果要做廣東歌，一定係《孤單公園》咁，當我知呢首歌係你有份編曲時，嘩！我簡直對你尊敬直線上升！」
軒仔在安歌環節請來泳兒上台合唱《石徑》，又大談兩人之間的緣份，軒仔當年兼職港台DJ，泳兒第一張派台作品《感應》便是交由他手上，她還感觸地說：「我第一隻派台碟喺你手，我冇乜人識，第一個小小演唱會，你都願意來幫我做嘉賓‥‥‥」軒仔連忙幫熱淚盈眶的她抹去淚水，再鼓勵道：「每個人也是由一張白紙開始，只要肯努力，聽眾耳朵係雪亮！你一定會有好成績！」